Электронлă вулавăш

Пĕр тăван Турхансене

Çунат панă кĕтесе

Эп пăхатăп тĕсесе,

Ас илсе сăвăçсене.

Улшăннă, курап, Турхан.

Авалхи кунта юлман.

Ял сăн-пичĕ çĕнелет,

Ешерет, чечекленет.

Кам упратăр иртнине

Лайăхрах ват йăмраран?

Астăвать-тĕр илтнине

Каш! кашлать-ха айлăмра.

Çил килсе çулçăсене

Вĕçтерсе пăлхатнă май,

Калас тенĕн пĕлнине

Тем шавлать, шырать пĕрмай.

Хуçайман-ха самана

Ун тĕреклĕ тымарне.

Вăл сана тата мана

Калас тет пуль сăмахне.

Пултарулăх çыннисем —

Якку, Хĕветĕр те Энтри —

Хавха тупса çырнисем,

Сăвăçсене пĕлетри.

Чăваш ĕмĕт-шухăшне

Типтерленĕ хуп ăшне,

Шурă хута хуратса,

Халăхăма юратса.

Тăван сăмах ăшшине

Курса, чĕре хушнине,

Сăмахлăхăн ырлăхне

Панă Чăваш халăхне.

Пăлхавăрлă саманан

Пăхсан вĕçĕ курăнман.

Шухăшланă пĕр тăван:

Пурнăç вĕренсен аван.

Суха çынни — ĕç çынни

Ĕçпе авнă пилĕкне.

Ĕçре хĕмленсе çунни

Курман раскал пиллĕхне.

Тĕнче аслă мĕн тери,

Пĕлмеллине пĕлмелле.

Чăваш çулне меллеме

Кирлĕ мар-и чун тĕрри?

Ку тарана çитиччен

Чăваш сăвви янраман,

Хăй илемне çутиччен

Сăмах халлĕн аптраман.

Илтеймен-и кĕреке

Несĕлсенĕн юррине?

Тахçан пулнă кĕнеке —

Юлнă тĕнче хĕррине…

Ăна епле эсремет

Лӳчĕркесе çук тунă?

Е пытарнă Киремет

Ыйтсан пĕлмĕшле туннă.

Çуралаççĕ Чăвашра

Улăп евĕр сăвăçсем,

Кашниех маттур, вастра,

Сăвăçсем-сăмахçăсем.

Ахальтен-и, Чăвашра

Сăвăçсем иккен сумра.

Çак йăмра пекех патвар,

Чĕлхипе сапаç кăвар.

«Ыр сăмах вăл — сарă çу», —

Калаçатчĕ аслаçу.

Шăранаççĕ сăмахсем

Чун-чĕрери ахахсем.

Пулнă, пулĕç Турхансем,

Чаплă-чаплă сăвăçсем.

…Чăваш хĕрĕ — Варуççи

Тăван тăхăм шăпипе.

Чăнлăх кӳнĕ вут куççи

Йĕкĕреш пек Нарспипе.

Пурте капăр сăнарсем,

Сăвăланă сăмахсем.

Сăмахланă çаврасем,

Эрешленнĕ таврасем.

Пуç таяп Турхансене, —

Асăнса сăввисене.

Тав калатăп ятăртан,

Юлăр ĕмĕр ялтăран.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн