Татах эс килтĕн манăн тĕлĕке...


Татах эс килтĕн манăн тĕлĕке...

(Юпахлăхăм юлмасть-çке ĕлĕке.)

 

Умра каллех асран кайми туссем,

Ем-ешĕл те пăртак шупка тĕссем...

 

Çав тĕссенче шыратăп эп сана,

Тупса каласшăн пĕр пуплев кăна:

 

«Сана çеç эп кĕтетĕп, юрататăп...»

Юлашкинчен тинех сана тупатăп.

 

Ларатăн парта хушшинче пĕччен,

Çитетĕп сан пата çын куриччен.

 

Эс шурă тутăр çыхнă, шур саппун,

Çут улача кĕпе... Вĕрет яш юн.

 

Пырса тăратăп эпĕ юнашар:

Журнал сан аллунта, учебник мар.

 

Кĕçех ятне те уйăратăп ав:

Чăваш журналĕ тытнă эс — «Ялав».

 

Ун чух унта, паллах, ман сăвă çук,

Питех те кирлĕччĕ вăл çавăн чух.

 

Тен, эс вуланă пулăттăн ăна,

Ăнланăттăн вутпа çунан чуна

 

Сăмахсăрах... Анчах та «Ялавра»

Мана кам вырăн парĕ, ятсăра?..

 

Çавăнпала пăртакçă эп салху...

Çакна туятăн-и, тен, эсĕ ху.

 

Шăпах çак пит яваплă самантра

Вăрантăм кайрăм, сăну çеç асра...

 

Эй, пĕр сăмах та хушаймарăм-çке,

Яш чун кăна çаплах çурать çеçке.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: