Вунçиччĕри кăмăл

Шап-шурă лантăш.

Шурă çĕмĕрт.

Сирень чечекĕ кĕп-кĕрен.

Çурхи каçра çиçсессĕн ĕмĕт,

Ăçтан киле васкав кĕрен?

Вун çиччĕри çап-çамрăк хĕршĕн

Ытла асамлă çут тĕнче.

Утма тăрать —

пӳрте кĕресшĕн,

Чарнать шур çĕмĕрт умĕнче.

Пĕччен куккук таçта сас панăн

Кĕç туйăнать. Чăнах автать!

Хĕр чĕрине илем капланнă,

Тем кĕтнĕн вăл кăлт-кăлт тапать.

Утать те хĕр, аран хăйса пек

Сирень çине ӳкет алли.

Ӳсет чун тунсăхĕ, асапĕ...

Сирень турачĕ кам валли?!

Каччă хĕре: атя, çул май-и? —

Тесе тытас тăк аллинчен,

Ăна никам çăлса çăлаймĕ:

Хĕр чунĕ — пĕлĕт тӳпинче!

Çĕнĕ комментари хуш