Электронлă вулавăш

Калаçура час-час çакна илтетпĕр:

пулать хура та шурă ăмсану.

Хура тĕсе мĕн ачаран сивлетпĕр,

шурри вара — тасалăх, вăтану.

 

Шур кĕпепе çӳрен çынра тасалăх

е кăмăллă тирпейлĕх çеç курса,

хисеплĕн пус тайса паратпăр алă —

анчах çӳрет леш вĕчĕ çеç хурса.

 

Кайран калатпăр: чунĕпе хура вăл!

Тус-йышĕ тахçанах çак çĕлене

асăрхаса хак панă: «Пилсĕр явăл!»

Кăтартнă пурнăç унăн чăн сăнне.

 

Апла пулсан, ăмсанăвĕ хура ун:

сăн-пичĕпе çеç капăр манекен!

Суя илемпеле куçа юраймăн —

çур пус тăман çынсен ретне лексен.

 

Шур ăмсану!.. Ку чăвашла та мар-тăр?

Тен, ырă ăмсану калас сăмах

тĕлне килет? Чĕлхеçĕ, ах, каçартăр:

чăваш хуранĕнче кун пек çăмах

 

çуккишĕн вăл пултарĕ хăтăрмашкăн.

Анчах калас тени-çке хĕтĕртет

хитре эпитет чечекне татмашкăн —

мана вăл хĕр кулли пек илĕртет.

 

Ыр ăмсану! Эс шурă-и е симĕс?

Хурасăр пуçсăр, пур тĕсе илсе,

чун пахчинче кайран пухатăн çимĕç:

астив ăна, тăван, тути килсен.

 

Хура ăмсанупа наркăмăшланнă

çынсем çеç вĕчĕхсе те тĕркĕшсе

çул юппинче юлаççĕ шăм кăшланăн,

эс, шухăш, кун пирки ан вĕркĕшсем!

 

Элек-челеклĕ, сĕлекеллĕ, путсĕр

чĕлхесенче чĕре сăмахĕ çук.

Хура тĕсе эп кураймастăп шутсăр:

ăшчикĕм, эс — ялан хĕвеллĕ çурт!

 

Ыр ăмсану — хирти чечек пек шурă,

ларать куллен пыл хурчĕ ун çине.

Мана, эппин, çакна пĕлсен те юрĕ

хавас куçпа пăхмашкăн тĕнчене.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн