Ӳпкевĕм çук: хĕн курчĕ пирĕн ӳсĕм...

Ӳпкевĕм çук: хĕн курчĕ пирĕн ӳсĕм,

çупăрламарĕ пурнăç ачаран.

Эпир пĕрех çитернĕ хурçă тӳсĕм

Яш ĕмĕт çилкеçне сарма кайран.

Тĕнче ытамĕ парайман та ăшă,

хĕрӳлĕх пирĕн пулнă хамăрта.

хăш чух вăркать-ха, лăпланмасăр, ăшăм,

темле сив хум чупать пек кăкăрта.

Тен, çавăнпа куçа сив тĕс ӳкет-и?

Çурхи хĕвел ăшăтаймасть ăна.

Йăпатаймасть пек кăн-кăвак тӳпе те,

екке вăл яраймасть-çке ăстăна.

Кирлех-и тетĕп йĕрмĕшен ӳпкев?

Ан пултăрччĕ чĕрешĕн çав тӳпкев.

Çĕнĕ комментари хуш