Юратăр!1

Юратăр!

Мĕнех калас сире халалласа,

Çĕн ĕмĕрти ытарайми яш-кĕрĕм —

Чăваш çыннин çунатлă ывăл-хĕрĕ?

Ӳссе çын пулăр чунпапа таса.

Мĕскер тытса тăрать ку тĕнчене?

Вăл - юрату. Эсир çакна ан манăр,

Çĕр-аннĕре, тăван çĕре юратăр,

Хисеплĕр ыр сунса ваттисене.

Чăн юрату тăсать вăл ĕмĕте,

Мăшăрсене чун-чĕререн юратăр,

Пĕр-пĕринпе ун чух телей куратăр, —

Хам тӳснине калатăп эп сире.

Усал çынна ан суйлăр, ан юратăр —

Унпа çывăхлансассăн хур куратăр.