Кĕрхи илем
Кĕрхи сăнарăн пур ĕлккемлĕх,
Чуна кайса тивен илем.
Çунаççĕ çулçăсем хĕлхемлĕн,
Вĕçсе иртеççĕ кайăксем.
Пăлан пек ĕнесем çӳреççĕ
Пас тытнă çеремсем çинче.
Хĕвелĕн пичĕ пĕчĕкçеççĕ
Ирхи тĕтрелĕх хыçĕнче.
Йĕтемсенче илеççĕ авăн,
Ĕç шавĕ хăлхаран каймасть.
Пахча тулли арбуз та кавăн, —
Кĕр мăнтăрне ут туртаймасть.
Лаçсем çинче чĕтренчĕк тĕтĕм, —
Сăра çакаççĕ инкесем.
Уяв тесен — ял-йыш пĕр пĕтĕм,
Ĕçре те — çавă, пикенсен!
Саламлă, савнăçлă, ĕлккемлĕ
Ик куç тулли кĕрхи илем...
Анчах та темшĕн, тем хĕрхеннĕн
Кăшт ассăн сывласа илен...
Мĕскершĕн тунсăх, кулянулăх
Амаланать пек чĕрере?..
(Салхулăх, кай кунтан, ан çулăх!
Эс ют хальхи поэзире.)
Шавланă-иртнĕ çамрăк шухлăх
Темме çаплах аса килет?..
Малта?.. Малта мĕн? — Шурă пушлăх,
Тесе ак рифма ответлет.
Мĕнпе кун-çулăм курĕ кунăç,
Мĕскер хăварăп асăнма?
Кĕр кунĕ! Ырлăхлă кĕр кунĕ,
Кĕвĕçтеретĕн эс мана.
Эс пур — кунта ахаль килмерĕн,
Эс патăн мĕн памаллине.
Ним çук çĕре эс çимĕçлерĕн,
Хисеп туса ĕç аллине.
Ак халĕ сумлăн уйрăлатăн,
Ху тивĕçне хăвах туйса...
Çапла каять çул çитнĕ ватă,
Ун сăнĕ лăпкă та таса.
Юлашки хут ăна чыс тунăн
Кашлаççĕ савнă йăмрисем.
Йĕри-тавра тăраççĕ унăн
Мал ĕмĕтлĕ ывăлĕсем...
Поэтăм, вилĕме ан асăн,
Çак пурнăç — ĕмĕрхи илем.
Кун-çулĕ кăлăх пулмасассăн,
Вилсен те пурăнать этем.
Шухăшсем
План можите пожалуйста написать
Большое спасибо! Это является потрясающ...
Вау, привлекательно веб-сайт...
Вау, привлекательно веб-сайт...
Вау, привлекательно веб-сайт...
Вау, привлекательно веб-сайт...
Вау, привлекательно веб-сайт...
Питĕ чуна пырса тивекен сăвă...
Ĕлĕк , вуншар çул каялла , тейĕпĕр , вул...
Пĕр калаврах ĕç-пуçĕ целăй романлăх !!!