Çурçĕр енчен, çилленсе...

Георгий Тал-Мăрса | Сăвă | 1 334


Çурçĕр енчен, çилленсе,

Хăвасене силлесе,

Мăрьесенче уласа,

Арçури пек ахăрса,

Вĕрет вăйлă тухатмăш,

Салху тăсать: ăш-ăш-ăш.

Е çил-тăвăл тапратать,

Урам тăрăх кустарать.

 

Çын курайми аллипе

Татать хăва çулçине,

Мукалайми çавипе

Çулать тĕнче илемне.

Хура вăрман хумханса,

Çĕре çити тайăлать,

Куççулĕпе макăрса

Хăй çулçипе уйрăлать.

 

Вĕçен кайăк васкаса,

Хăй йăвине пăрахать.

Кичем-кичем кăшкăрса,

Сĕм вăрмана хăварать.

Картан-картан пухăнса,

Вĕçет кăнтăр еннелле.

Хăй йăвине асăнса

Тăкать вĕри куссульне...

 

Хура вăрман, сĕм вăрман,

Çта илемӳ кайрĕ сан?

Кам çурчĕ сан чĕрӳне,

Кам татрĕ сан ĕмĕте?

Хура вăрман, хумханса,

Ларать йĕрсе, ахлатса.

Пĕр тухатмăш савăнса

Ĕçлет ĕçне, ахăрса.

 

Шăнкăр-шăнкăр юхан шыв,

Мĕншĕн эсĕ пăтранан?

Мĕншĕн тарăн çырмара

Тăмлă хăйăр тапратан?

Мĕншĕн санăн тĕпӳнте

Çутă пулă курăнмасть?

Мĕншĕн вĕт-шак кĕтӳпе

Шыв хĕррине пухăнмасть?

 

Çта илемлĕ çырансем?

Ăçта кайнă чарлансем?

Мĕншĕн шаннă чечексем?

Çта çухалнă çĕленсем?

Мĕншĕн хăмăш хумханать,

Çапкаланать, хусăлать?

 

— Эх, ан ыйтсам эс манран,

Тарап эпĕ хам хамран;

Иртрĕ манăн çутă кун,

Сыв пул, йĕкĕт, сывă пул.

 

Çутă тĕнче хурланса

Хăй çуттине çухатнă.

Çутă хĕвел вăтанса

Пĕлĕт хыçне пытаннă.

Кăн-кăвакчĕ вĕт пĕлĕт —

Халĕ кайнă хуралса...

Те чăнах ку, те тĕлĕк, —

Вăл та Йĕрет хурланса.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: