Сайта кӗр | Регистраци | Сайта кӗрсен унпа туллин усӑ курма пулӗ
 +3.6 °C
Ҫӑкӑр-тӑвар хире-хирӗҫ.
[ваттисен сӑмахӗ]
 

Илле Иванов: Чӑвашсен тусӗ Харун Гӳнгёр профессорпа, докторпа сывпуллашса…

Илле Иванов09.11.2020 09:503716 хут пӑхнӑУлӑштар Кӑларса пӑрах

Инҫетри, анчах тӑванлӑ Турцирен хурлӑхлӑ хыпар килчӗ – 2020 ҫулхи чӳкӗн пӗрремӗш кунӗнче, 71 ҫула кайса, чӑваш халӑхӗн ҫывӑх тусӗ, Турцири Кайсери хулинчи Эржиес университечӗн профессорӗ, ӑслӑлӑх докторӗ Харун Гӳнгёр (Harun Güngör) ҫак пурнӑҫран уйрӑлса кайнӑ, ӑна тепӗр кун, кӑнтӑрла иртсен, Сарывӑл (Sarıoğlan) тарӑхӗнчи хӑй ҫуралса ӳснӗ Ӳҫерлӗх (Üzerlik) ялӗн масарне пытарнӑ. Ҫак ҫухату пирӗншӗн те пысӑк хуйхӑ, унӑн мӑшӑрӗпе Нуран (Nuran) ханумпа, ывӑлӗсемпе Афшинпа тата Санчарпа (Afşin, Sancar), кинӗпе Чананпа (Canan), мӑнукӗпе Тӳркер Харунпа (Türker Harun), тӑванӗсемпе тата тусӗсемпе пӗрле чунтан хурланни ҫинчен пӗлтеретпӗр, вӗсене тата вӗсемпе пӗрлех пӗтӗм Тӗрӗк тӗнчине пуҫ сывлӑхӗ сунатпӑр.

Харун Гӳнгор профессор, доктор ӑслӑлӑхра тӗрӗк халӑхӗсен тӗнӗсене тарӑн тӗпченипе палӑрнӑ. Ҫавна май вӑл Тӗрӗк тӗнчинче Анӑҫран Тухӑҫа ҫити – Балканран пуҫласа Монголи таран - нумай хутчен ҫул ҫӳренӗ, ҫав шутра темиҫе хутчен Чӑваш Енре, Чӗмпӗр облаҫӗнче, Мари Элра пулнӑ, авалхи тӗнпе пурӑнакан Чӑвашкасси ҫыннисемпе, чӑвашсен паллӑ тӗпчевҫисемпе, ҫав шутра, хӑй пекех, тӗнсене тӗпченӗ Петр Денисов профессорпа, докторпа тӗл пулса калаҫнӑ, ӑслӑлӑх ыйтӑвӗсене сӳтсе явнӑ.

Чӑваш ҫамрӑкӗсене Турцири университетсенче тӳлевсӗр пӗлӳ илме вӗренме янӑ ҫулсенче Харун Гӳнгор профессор, доктор Кайсерири тата ытти университетсенче вӗренекен чӑваш ачисемшӗн аслӑ тете (пичче) вырӑнне пулса, яланах вӗсене пулӑшса тӑнӑ. Вӗсен кил алӑкӗсем чӑваш ҫамрӑкӗсемшӗн яланах уҫӑ пулнӑ. 90-мӗш ҫулсен варринелле ку пирӗн ҫамрӑксемшӗн мӗн тери хаклӑ пулнине ҫакӑ та ҫирӗплетет: ҫав вӑхӑтра кӗсье телефонӗсем пулман-ха, ҫыру та икшер уйӑх килнӗ, чӑваш ҫамрӑкӗсем ашшӗ-амӑшӗпе те тӑтӑш хыпарлашса тӑрайман, ҫавӑнпах халиччен пулса курман ҫӗршывра ҫывӑх тӑван пек ҫынсем пурри калама ҫук хаклӑ пулнӑ. Харун Гӳнгорӑн тата ун пекех ҫӗршер те ҫӗршер турккӑ ҫыннин ӑшпиллӗхне чӑваш халӑхӗ нихӑҫан та манас ҫук.

Яшлӑхра, Турцире те тӗрӗк ҫынни пулма, тӑванла ытти тӗрӗк халӑхӗсене «тӑван» тесе калама чарнӑ ҫулсенче, урамри ҫапӑҫусенче пӑшалтан пенӗрен аманнӑ пулин те, Харун Гӳргёр нихҫан та ҫынлӑхне ҫухатман, Тӑван Ҫӗршывне – Тӗрӗкьеле (Türkiye) чунтан юратнипе пӗрлех, тӑванлӑ тӗрӗк халӑхӗсене хисеплеме, пӗр-пӗриншӗн усӑллӑ ҫыхӑнусем йӗркелеме пулӑшма пӑрахман. Ҫак тӗллевпех вӑл Бишкекра Турципе Каркӑс патшалӑхӗсем уҫнӑ Манас университетӗнче ӗҫленӗ, Туркестанри турккӑ-казахсен Есеви ячӗллӗ университечӗпе тачӑ ҫыхӑнусем тытнӑ, унта та вӑл яланах чӑваш ҫамрӑкӗсене пулӑшнӑ. Ҫавӑнпах вӑл пирӗншӗн ӗмӗр-ӗмӗр манӑҫми ҫын.

Йывӑр тӑпри ҫӑмӑл пултӑр! Чунӗ ҫӑтмахра пултӑр, сӗтлӗ кӳлӗре ҫуретӗр! Хӑй хисепленӗ Чӑвашкассинчилле каласан, леш тӗнчере те ӑна хӗвел ӑшши ӑшӑттӑр, унӑн чунне сиплетӗр!

Тӗрӗк тӗнчин культурӑ тӗввин ертӳҫи, Чӑваш Республикин культурӑн тава тивӗҫлӗ ӗҫченӗ, Абдюльхак Хамид Тарханӑн поэзири Аслӑ парнине тивӗҫнӗ Илле ИВАНОВ.

 

Фотоӳкерчӗксенче: 1.Турцире вӗренекен чӑваш ҫамрӑкӗсен пӗр ушкӑнӗ Харун Гӳнгёр килӗнче хӑнара. 2.Харун Гӳнгёр Чӑваш Енре. 3.Харун Гӳнгёр Мари Элра. 4.Харун Гӳнгёр Монголире, тӗрӗксен авалхи палӑкӗ умӗнче.

 
Редакцирен: Статьяна вырнаҫтарни редакци автор шухӑшӗпе килӗшнине пӗлтермест.

Комментари:

Cтаньял // 3520.21.4288
2020.11.09 19:45
Турцире вӗреннӗ ачасем халӗ ӑҫта? Вӗсем ҫинчен ҫырмаллах, Илле.
Туссем пирки вӗсем пурӑннӑ вӑхӑтра калама тӑрёш-ха!
Гюнтерӑн кирлӗ ӗҫӗсемпе чӑваша паллаштарасчӗ

Комментариле

Сирӗн ятӑp:
Анлӑлатса ҫырни:
B T U T Ячӗ1 Ячӗ2 Ячӗ3 # X2 X2 Ӳкерчӗк http://
WWW:
ӐӑӖӗҪҫӲӳ
Пурӗ кӗртнӗ: 0 симв. Чи пысӑк виҫе: 1200 симв.
Сирӗн чӑвашла ҫырма май паракан сарӑм (раскладка) ҫук пулсан ӑна КУНТАН илме пултаратӑр.
 

Эсир усӑ курма пултаракан Wiki тэгсем:

__...__ - сӑмаха каҫӑ евӗр тӑвасси.

__aaa|...__ - сӑмахӑн каҫине тепӗр сӑмахпа хатӗрлесси («...» вырӑнне «ааа» пулӗ).

__https://chuvash.org|...__ - сӑмах ҫине тулаш каҫӑ лартасси.

**...** - хулӑм шрифтпа палӑртасси.

~~...~~ - тайлӑк шрифтпа палӑртасси.

___...___ - аялтан чӗрнӗ йӗрпе палӑртасси.

Orphus

Ытти чӗлхесем

Баннерсем

Шутлавҫӑсем