Чӑваш — мӗн тери вӑл юмарт, ҫутӑ кӑмӑллӑ, иксӗлми вӑй-халлӑ. Унӑн пултарулӑхӗ яланах ҫӑлкуҫ пек тапса тӑрать. Чӑваш ҫынни ӗҫчен, хастар, яланах ырӑ ӗҫсем тума тӑрӑшать. __Геннадий Федорович Юмарт__ (Трофимов), ҫакӑн пек чӑваш йӑхӗнчен тухнӑскер, кӗҫех 75 ҫул тултарать. Чӑваш халӑхӗн мухтавлӑ ывӑлӗ паянхи кун та чунне парса тӑван халӑх культуришӗн, чӗлхе аталанӑвӗшӗн пысӑк пӗлтерӗшлӗ ӗҫсем тӑвать. Вӑл — чӑваш халӑх сӑмахлӑхне пухса тӗпчекен, сӑвӑҫӑ, куҫаруҫӑ.

Пултаруллӑ ӗҫтешӗмӗрӗн юбилейне халалласа, унӑн ӗҫӗсен пӗлтерӗшне пӗтӗмлетсе __чӑваш филологийӗпе культура факультечӗн__ сумлӑ вӗрентекенӗсем, студенчӗсем паян, акан 19-мӗшӗнче, К.И.Иванов тӗпелӗнче поэзипе чӑваш тумӗн уявне йӗркелерӗҫ. Уява И.И. Иванов доцент ертсе пычӗ. Г. Юмарт пурнӑҫӗпе пултарулӑхӗ пирки факультет ӗҫченӗсем каласа пачӗҫ. Пӗрремӗш курс студенчӗсем вара поэтӑн сӑввисене вуларӗҫ. Геннадий Юмартӑн поэзийӗ чӑвашӑн аваллӑхӗнчен тухса тӑрать, этемӗн кӑмӑл-сипечӗ пирки шухӑша кайни тӗп вырӑн йышӑнать унта. Чӑваш тумне тӑхӑннӑ яш-кӗрӗм (Сергей Хмелев, Анастасия Владимирова) хӑйсем ҫырнӑ сӑвӑсене те вуларӗ уявра, чӑваш ташшипе те савӑнтарчӗ (Марина Кондукторова).

Факультетра __И.Я. Яковлев__ вӗрентекенӗмӗр ҫуралнӑранпа 165 ҫул ҫитнине уявланӑ май чӑваш халӑхӗн паянхи маттур сӑвӑҫине чыслани те питӗ пысӑк пӗлтерӗшлӗ. Шӑпах ҫавӑн пек сӑвӑҫсем, тӗпчевҫӗсем тӗнчене килччӗр тесе вӑй хунӑ-ҫке пирӗн мухтавлӑ ҫутлӑхҫӑ.