Паян, акан 26-мӗшӗнче, __Чӑваш патшалӑх гуманитари ӑслӑлӑхӗсен институтӗнче__ __Чӑваш чӗлхи кунне__ халалласа **«Тӑван чӗлхен кун-ҫул хевти»** ҫавра сӗтел иртрӗ, ӑна институт директорӗ __Ю.Н. Исаев__ ертсе пычӗ.

10 сехетре пуҫланнӑ ӗҫлӗ калаҫу тӑватӑ сехет тӑсӑлчӗ. Тӗрлӗ ҫынсем тухса калаҫрӗҫ — министерствӑсенчен килнисем те, ӑсчахсемпе ҫыравҫӑсем те, чӑвашлӑх шӑпишӗн пӑшӑрханакан уйрӑм ҫынсем те. Ҫакӑн пек сӗнӳсем пачӗҫ:

• Ача пахчисенче чӑвашла вӗренти кирлӗ. Ҫавӑн пекех ача пахчисенче тӑван культурӑпа паллаштарма пултаракан «асанне» пулмалла (тутарсен опытне шута илсе).

• Чӑваш Республикинче пурӑнакан кашни ҫыннӑн кирек хӑш организацире те икӗ патшалӑх чӗлхипе пӗр шайра усӑ курма майсем пулмалла.

• Чӑваш Республикин чӗлхе службине туса хумалла; куҫару ӗҫӗпе пулӑшмалла (тӳлевсӗр).

• Чӑваш халӑхне упраса хӑварас тӗлӗшпе тӗллевлӗ Программа хатӗрлесе йышӑнмалла.

• Чӑваш Республикин патшалӑх чӗлхисене пӗр тан шайра усӑ курмалли 10-20 ҫуллӑх ӗҫ планӗ палӑртмалла.

• Тӳре-шарасене халӑхпа чӑвашла ытларах калаҫма сӗнмелле.

• Чӑваш чӗлхине май пур таран пур сферӑна та кӗртме тӑрӑшмалла — интернета, телекурава, компьютера т.ыт.

• Наци политикине йышӑнмалла. Министерство шайӗнче наци политикишӗн яваплӑ орган пулмалла (Удмурти, Мордови тӗслӗхӗпе).

• Чӗлхе сакунне пурнӑҫлама уйӑракан укҫана грант мелӗпе валеҫмелле.

• Чӑваш чӗлхине вӗренмелли хальхи методикӑпа ҫырнӑ кӗнеке кирлӗ. Ӑна ӑмӑрту ирттерсе хатӗрлемелле, укҫине темиҫе ҫӗр пинран сахал мар уйӑрмалла.

• Наци культурине аталантарма пултаракансене ятарласа вӗрентсе ҫитӗнтермелле.

• «Чӑваш Ен» телерадиокомпани ҫумӗнче радиора тата инҫекуравра ӗҫлеме пултаракансене вӗрентекен шкул уҫмалла.

• Чӑваш радионе анлӑрах сармалла — ӑна Шупашкарта та, ялта та итлеме ҫӑмӑл майсем пулмалла.

• «Тӑван Ен культурине» шкулта тивӗҫлӗ шайра вӗрентмелле.

• Шкулсенче чӑваш чӗлхин сехечӗсене вырӑс чӗлхи сехечӗсем таран ҫитерме тӑрӑшмалла.

• Чӑваш культурипе чӑвашла пӗлекенсене кӑна мар, вырӑсланнӑ чӑвашсене те паллаштармалла, ун валли майсем тумалла (вырӑсла тухакан хаҫат-журналсенче чӑвашлӑх темине ытларах ҫӗклемелле).

• Чӑваш Элтеперӗн чӑваш халӑхӗ ҫине таянса ӗҫлемелле — вара хӑйне те ҫӑмӑл пулӗ, сумӗ те ӳсӗ.

__http://fotki.yandex.ru/users/chuvashorg/album/138987/_**Сӑнсем**__ (41)