Акан 17-мӗшӗнче Красноармейски районӗн халӑх пултарулӑхӗн ҫуртӗнче Н. Янкас ячӗллӗ премин ҫӗнӗ лауреачӗсене чысламалли каҫ иртрӗ.

Каҫа районти Н. Янкас ячӗллӗ литературӑпа ӳнер тата культура пӗрлӗхӗн ертӳҫи Г.Л. Ефимов уҫрӗ. Район администрацийӗн культура, спорт тата ҫамрӑксен политикин пайӗн пуҫлӑхӗ А.Н. Лебедев пухӑннисене ҫав уяв ячӗпе ӑшшӑн саламларӗ. 2011 ҫулшӑн Н. Янкас ячӗллӗ премие парас енӗпе ӗҫлекен комисси председателӗ Н.Г. Ершов преми илме тӑратнӑ кандидатсем пирки комиссине килнӗ ӗҫлӗ хутсемпе паллаштарчӗ, кашни лауреатӑн пурнӑҫӗпе пултарулӑхӗ ҫинчен тӗплӗн чарӑнса тӑчӗ. Иккӗн тивӗҫ пулнӑ ҫак чыса кӑҫал: Иван Петрович Матвеев фотоӑстаҫӑпа __Клавдия Ильинична Васильева__ сӑвӑҫ.

И.П. Матвеев 1949 ҫулта __Ҫӗнӗ Йӗкӗт__ ялта ҫуралнӑ. __Упири__ вӑтам шкул хыҫҫӑн вӑл __И.Я. Яковлев ячӗллӗ Чӑваш патшалӑх педагогика институтӗнчен__ вӗренсе тухнӑ. Каярахпа ӗҫленӗ хушӑрах __Чӑваш патшалӑх университечӗн__ географи уйрӑмӗнчен пӗлӳ илсе тухать. 1976 ҫултанпа __Упири__ вӑтам шкулта ачасене ӳнер, черчени тата ӗҫ енӗпе вӗрентет. Мӗн ачаран хӑй сӑнӳкерчӗксем тума юратнӑран, ҫак ӑсталӑха ҫур ӗмӗре яхӑн туптаса пынӑ. Унӑн ӗҫӗсем районти тата республикӑри куравсенче малти вырӑнсене йышӑннӑ. Хальхи чыслав каҫӗнче те вӑл ертсе пынипе шкул ачисем ӑсталанӑ хатӗрсен тата хӑй ӳкернӗ пейзажсен куравӗсем пулчӗҫ.

Лауреат ятне пама И.П. Матвеева районти «Ял пурнӑҫӗ» хаҫат редакцийӗпе Упири вӑтам шкул коллективӗсем сӗннӗ.

__К.И. Васильева__ та педагогика ӗҫӗн ветеранӗ. Вӑл 1943 ҫулта __Канаш районӗнчи__ __Малти Тукай__ ялӗнче ҫуралнӑ. 1967 ҫулта __Шупашкарти__ Ф. Павлов ячӗллӗ музыка училищинчен вӗренсе тухнӑ — режиссер профессине алла илнӗ. Ӑна __Красноармейскинчи__ культура ҫуртне ӗҫлеме янӑ. Ҫакӑнта вӑл 16 ҫул тӑрӑшнӑ. Ӗҫленӗ хушӑрах __И.Н. Ульянов ячӗллӗ ЧПУра__ пӗлӳ илнӗ. Ун хыҫҫӑн __Красноармейскинчи__ вӑтам шкулта чылай ҫул ачасене вӗрентнӗ. Ҫав вӑхӑтрах К.И. Васильева сӑвӑҫ та. Ку таранччен «Чее хӗвел», «Тавах сана, ман ирӗк шухӑш», «Шан, ӗнен, юрат» ятлӑ сӑвӑсен пуххисем тухнӑ. Унсӑр пуҫне вӑл «Юхӑм» драма кружокне ертсе пырать.

Лауреат ятне пама К. И. Васильевана райадминистрацин культура, спорт тата ҫамрӑксен политикин пайӗ тӑратнӑ.

Ҫӗнӗ лауреатсене Н. Янкас ячӗллӗ преми лауреачӗн дипломне тата медальне парса чысларӗҫ. Ҫав ятпа вӗсене ҫак чыса тивӗҫме кандидата тӑратнӑ коллективсем, пӗрле ӗҫленӗ юлташсемпе тусӗсем чунтан саламларӗҫ, чечексем парнелерӗҫ.

Чыслав каҫӗ К. Васильева ҫырнӑ сӑвӑсене автор тата унӑн вӗренекенӗсем илемлӗн вуланипе, сӑвӑҫ тата режиссер пултарулӑх енӗсене сӑнлакан электронлӑ презентаци пӑхнипе, вӑл ертсе пыракан драма ушкӑнӗ лартнӑ спектакльсенчи сыпӑксене кӑтартнипе вӗҫленчӗ.