Иртнӗ суйлав вӑхӑтӗнче депутат пулма ӗмӗтленекен кандидатсем хушшинче кӑткӑс ӑмӑрту пычӗ. Пухусене халӑха ытларах пухас тӗлӗшпе, ахӑртнех, вӗсӗм суйлавҫӑсене чӑваш эстрадин ҫӑлтӑрӗсене илсе килсе савӑнтарчӗҫ. Тӳлевсӗр концертсене, паллах, халӑх йышлӑн пухӑнать. Анчах та чӑн-чӑн искусствӑна юратакансемшӗн спектакаль е концерта укҫалла билет туянса курасси те ансат мар.

Ҫапла вара, юнкун каҫ, тӳлевсӗр концертсем тин ҫеҫ иртсе кайрӗҫ пулин те, __Комсомольскинчи__ культурӑпа кану центрне кӳршӗ __Елчĕк район|Елчӗк район__ каччи __Алексей Московский__ килсе ҫитсен зала лӑк тулли халӑх тулчӗ. Ҫамрӑк юрӑҫ кунта пӗрремӗш хут ҫеҫ мар килчӗ пулин те, унӑн юррисене куракансем хапӑл тусах йышӑнчӗҫ. Килӗшӳллӗ тумӗсемпе, хусканусемпе, пичӗ ҫинчи йӑл кулӑпа юрӑ хыҫҫӑн юрӑ шӑрантарчӗ Алексей. Вӑхӑтран вӑхӑта залра пухӑннисене ачаш та ҫепӗҫ сассипе Алена Алексеева тыткӑнларӗ. Чӑн-чӑн сӑпайлӑ чӑваш хӗрӗ, хусканӑвӗсем тата! — акӑш евӗр, утти шыв пек юхать, пӑхса ытармалла мар.

Каҫалсемшӗн ҫак каҫ ҫӗнӗ ят та уҫӑлчӗ: Александр Нефрит. Александр халиччен курман-илтмен юрӑҫ пулсан та, пӗрремӗш юрринченех залра ларакансемпе пӗр сӑмах тупрӗ. Тахҫанах пӗлекен артист пекех тӑвӑллӑн алӑ ҫупса кӗтсе илсе ӑсатрӗҫ ӑна куракансем, чӑтӑмсӑррӑн тепӗр хут сцена ҫине тухасса кӗтрӗҫ. Чӑн та, юрӑҫӑн хӑйнеевӗрлӗхӗ, юрӑсене саспа ҫеҫ мар, пӗтӗм ӳт-пӗвӗпе шӑрантарни пурин кӑмӑлне те кайрӗ. «Ҫамрӑк артистӑн малашлӑхӗ — пысӑк сцена ҫинче… Пурте пӗлекен Валерий Леонтьева та ирттерет Нефрит… Кун пек юрӑҫсене Евровидени конкурсне кайсан та пӗртте намӑс курмалла мар!...», — илтӗнче унта та, кунта та.

Георгий Мокеев конферансье те концерта пӗлсе йӗркелесе ертсе пычӗ, хутран-ситрен ҫынсене култарчӗ, тӑрсан-тӑрсан шухӑша та ячӗ.

Тулли кӑмӑлпа ял халӑхӗ килсенелле саланчӗ. Чӑн та, ҫыннӑн хырӑм тутипе ҫеҫ мар, чун-чӗрене савӑнтарма та пӗлмелле. Унсӑрӑн, епле-ха вӑл, пурнӑҫ?