Сайта кӗр | Регистраци | Сайта кӗрсен унпа туллин усӑ курма пулӗ
 -8.0 °C
Пулӑ пуҫӗнчен ҫӗрет.
[ваттисен сӑмахӗ]
 

Софья Савнеш: Наркӑмӑшлӑ пултӑран пушӑ ҫӗрсене пусса илет

Софья Савнеш12.03.2017 20:092231 хут пӑхнӑ

Халӗ ялта ӗлӗкхи пек выльӑх-чӗрлӗх йышлӑ усрамаҫҫӗ. Ҫавна май улӑх-ҫаранпа курӑк вӑйлӑ ешӗрет, этем ҫӳллӗшех ӳсет. Хӑть ҫавапа кайса ҫул. Темиҫе ҫул каялла ун пек пулман. Астӑватӑп-ха: анне ӗнене кӑкарма ир-ирех, 4 сехетре, тухса каятчӗ. Кӑштах каярах юлсан ӗне кӑкарма вырӑн юлмастчӗ. Каярахпа ялта касу яма пуҫларӗҫ. Кун хыҫҫӑн уй кӑштах пушанчӗ. Асанне пурӑнакан урамра вара 1 ҫын ҫеҫ ӗне усрать. Ҫавӑнпа вӗсем патӗнчи уя тухса утӑ ҫулма пулать. Тепӗр тесен, асаннесен урамӗнче ҫын та юлмарӗ. Вӑй питтисем те, ватӑ ҫынсем те самай вилчӗҫ. Урамра — 11 кил. Вӗсенчен виҫҫӗшӗнче ҫеҫ ҫын пурӑнать.

Выльӑх-чӗрлӗх сахал усранӑран уйсем ҫум курӑкпа тулма пуҫларӗҫ. Юлашки вӑхӑтра пур ҫӗрте те тенӗ пекех наркӑмӑшлӑ пултӑран ӳсет. Этемрен те ҫӳллӗскер питӗ вӑйлӑ ашкӑрать: такам вӑррине сапса хӑварнӑ тейӗн. Ку ӳсен-тӑран питӗ хӑвӑрт сарӑлать. Унран пин-пин вӑрӑ тӑкӑнать. Темиҫе ҫул каялла ҫак наркӑмӑшлӑ курӑк пирӗн анкарти хыҫӗнче пачах ҫукчӗ. Ӑҫтан тупӑнчӗ вӑл? Темиҫе ҫулта вӑл таҫта ҫитиех сарӑлчӗ.

Хӑй вӑхӑтӗнче ӑна Раҫҫее ют ҫӗршывран илсе килнӗ. Чикӗ леш енче ку ӳсен-тӑрана ӗнене ҫитернӗ-мӗн. Ҫапла майпа выльӑх сӗт хушнӑ. Наркӑмӑшлӑ пултӑрана ӗне чӑнах та ҫиет. Анчах кӑштахран ӑна ӳстерме пӑрахнӑ, мӗншӗн тесен унпа сӗте йӳҫӗ тутӑ ҫапать. Анчах вӑл Раҫҫейре пур-пӗрех юлнӑ. Халӗ ав юлашки ҫулсенче ҫырма-ҫатрара та, анкарти хыҫӗнче те, ҫул хӗрринче те ӳсет. Ҫул хӗрринче тенӗрен, питӗ килӗшӳсӗр курӑнать ку. Наркӑмӑшлӑ пултӑран вӑрман пекех кашласа тӑрать. Тем тесен те, ял тӑрӑхӗн администрацийӗсен ку енӗпе ҫанӑ тавӑрсах ӗҫлемелле. Наркӑмӑшлӑ пултӑрана касса ывӑтнипех пӗтереймӗн. Ӑна тымарӗпех кӑкламалла. Паллах, ӗҫлемелӗх пур. Анчах нимӗн те тумасан вун-вун ҫултан наркӑмӑшлӑ пултӑран пушӑ ҫӗрсене йӑлтах пусса илӗ.

Ку курӑк питӗ наркӑмӑшлӑ. Унӑн сӗткенӗ ӳте лексен хӑмпӑланса тухать. Кун пирки вара кашниех пӗлмест. Хам та чухламан. Пӗр ҫулхине анкарти хыҫӗнчи пултӑрана кӗреҫепе касса ывӑтрӑм. Ҫуллаччӗ ун чухне. Ку курӑкӑн сӗткенӗ тунинчен шапӑртатсах юхать. Паллӑ ӗнтӗ: пултӑранӑн сӗткенӗ ӳте лекнӗ. Тепӗр кунхине ура йӑлтах хӑмпӑланса тухрӗ! Вӑт ҫапла, асӑрханмалла. Наркӑмӑшлӑ курӑка тӗп тумаллах.

 

Комментариле

Сирӗн ятӑp:
Анлӑлатса ҫырни:
B T U T Ячӗ1 Ячӗ2 Ячӗ3 # X2 X2 Ӳкерчӗк http://
WWW:
ӐӑӖӗҪҫӲӳ

Пурӗ кӗртнӗ: 0 симв. Чи пысӑк виҫе: 1200 симв.
Сирӗн чӑвашла ҫырма май паракан сарӑм (раскладка) ҫук пулсан ӑна КУНТАН илме пултаратӑр.

Эсир усӑ курма пултаракан Wiki тэгсем:

__...__ - сӑмаха каҫӑ евӗр тӑвасси.

__aaa|...__ - сӑмахӑн каҫине тепӗр сӑмахпа хатӗрлесси («...» вырӑнне «ааа» пулӗ).

__https://chuvash.org|...__ - сӑмах ҫине тулаш каҫӑ лартасси.

**...** - хулӑм шрифтпа палӑртасси.

~~...~~ - тайлӑк шрифтпа палӑртасси.

___...___ - аялтан чӗрнӗ йӗрпе палӑртасси.


Orphus

Баннерсем

Шутлавҫӑсем

 
Сайт пирки | Пулӑшу | Статистика
(c) 2005-2018 Chuvash.Org
Сайтри материалсене (ытти ҫӑлкуҫсенчен илнисемсӗр пуҫне) CreativeCommons Attribution-ShareAlike 3.0 лицензипе килӗшӳллӗн усӑ курма пулать. Сайтпа ҫыхӑннӑ ыйтусене кунта ярӑр: site(a)chuvash.org