Вырӑс чӗлхинче "Родитель" тата "Родители" сӑмахсем пур. Халь вара вӗсене ак ҫапла ҫырса пӑхас: Родите ль? тата Родите ли? Мӗнле пек?

Эпир, айван чӑвашсем, "пӗрле ҫырмалла-ши е уйрӑм, е дефиспа" тесе тӗнкене кӑлартпӑр хамӑрӑнне. Курӑсӑр ырӑ ҫыннӑмӑрсем, ав еплерех сӑнарланать ҫавнашкал "проблема" вырӑс чӗлхинче!

Лингвистикӑра ГИПЕРКОРРЕКЦИ текен термин пур. Ытлашши ӑслӑ пулма хӑтланса шутсӑр тӗрӗс ҫырма е калама тӑрӑшнине ҫапла палӑртаҫҫӗ. Чӑннипе вара лешсен йӑнӑш пулса тухать....

Ав пирӗн "ӑславҫӑсенчен" хӑшӗсем халлӗхе сӑмахра л тата л саспаллисем хушшине ҫемҫетӳ паллине савӑлпа ҫапсах кӗртсе лартма хистеме пуҫларӗҫ. Халь сӑмахра хайхи паллӑ пур та, ҫавна кура ӑна хуть те мӗнле ситуацире те ҫырмаллах имӗш. Чӑннипе вара пурнӑҫра урӑхла тӗслӗхсем те пур. Пулать, анчах та Пулатчӗ. Малтанхи сӑмахра пур ь, тепринче — ҫук! Кун пирки тӗплӗнрех манӑн иккӗмӗш орфографи задачине (Задача 2) пӑхма пултаратӑр. http://chuvash.org/blogs/comments/2478.html

Халиччен вырӑнне Халӗччен калама-ҫырма хистени те гиперкоррекци тӗслӗхӗ.

Ҫавӑн пекех мӗнпур ӑнлавсене уйрӑм ҫырас ҫул ҫине тӑратма ӑнтӑлни — каллех гиперкоррекци. Мӗншӗн тесен йӗркевсем чӑннипе нихҫан та пӗрле ҫырассине хирӗҫлемеҫҫӗ.

Лингвистикӑри гиперкоррекци мӗнне Интернетри ресурссемпе усӑ курса та шӗкӗлчеме сӗнетӗп. Пӗлни пӑсмасть.