Юлашки вăхăтра çынсемпе пур çĕрте те тенĕ пекех сăпайлă калаçма тытăнчĕç. Халăха меллĕ пултăр текелесе нумай компани хĕрÿ лини номерĕсем те уçать. Анчах çав номерсем пурте йĕркеллех ĕçлеççĕ-и-ха?

Эп сиснĕ тăрăх, çук. Акă, çавна çирĕплетекен темиçе тĕслĕх. Тĕнче тетелне килти компьютертан урăх компани урлă тухмалла тăвас терĕм. Каланă - тунă. Хĕрÿ лини номерĕпе шăнкăравласа хăш-пĕр ыйтăва уçамлатма шăнкравлатăп. Лини вĕçĕнче автомат калаçать, эп çыхăнас тенĕ самантра операторсем пурте ĕçлĕ иккенне пĕлтерет, анчах кăштахранах ман пата хăйсем шăнкравласса ĕнентерет. Суяççĕ пуль тетĕр-и? Çук, кăштахранах шăнкравларĕç. Тепĕр куннех тĕнче тетелĕпе çыхăнтарса та пачĕç.

Пĕринче хайхи çыхăну тĕнче тетелне йăпăр-япăр илсе тухми пулчĕ: аран-аран кĕртет. Техника пулăшăвĕ текен уйрăма шăнкравлас-ха терĕм. Вăхăчĕ те аванахчĕ-ха, каçхи 10 сехетсемччĕ. Шăп та лăп 50 минут кĕттерчĕç. Автомачĕ: "Ан пăрахăр. Оператор пушансанах тытать", - тесе кашни минутра тенĕ пек каласа тăрать. 50 минутран пушанчĕ те оператор.

"Сирĕн шăнкăравăр пирĕншĕн питĕ хаклă. Телефона ан сÿнтеĕр, лини çинчех юлăр", - текен йышши тепĕр лини те пур юлашки вăхăтра. Вăл нумай хваттерлĕ çурта тĕплĕн юсас ыйтăва уçăмлатма тесе уçнă номер. "Çынсем йышлăн ыйтнине кура тепĕр лини уçнă", - хыпарланă кун пирки официаллă çăлкуçсенчен пĕринче. Атту унчченхипе шăнкăравласа илме хĕнччĕ. "Йышăну пÿлĕмĕпе çыхăнма 1 çине пусăр, юристсем кирлĕ тĕк 2 пусмалла, производство пайне 3..." - тесе хыпарлать-ха автомачĕ, анчах хăть 1 çине пус, хăть 4 çине - тытакан çук. Кĕтсен-кĕтсен "халĕ пурте ĕçлĕ" тесе хыпарлать те каллех унчченхи цифрăсене пусма сĕнет. Тепĕр лини уçнине илтсен савăнмаллипех савăнтăм. Çынсем те пĕлччĕр, çырса пĕлтерем-ха тетĕп. "Чим-ха, малтан шăнкăравласа пăхам-ха", - тесе телефон кĕпçине алла илтĕм. Çук, никам та тытмасть. Икĕ минут кĕтрĕм, пиллĕк, вуннă. Пулмарĕ шăнкăравласа илесси. Аптрушки ку хĕрÿ линисемпе. Е вĕсем хăйсен интересне кăна хÿтĕлеме кирлĕскерсем-ши?