Сайта кӗр | Регистраци | Сайта кӗрсен унпа туллин усӑ курма пулӗ
 -5.0 °C
Ҫӗнӗ тусна туп, киввине ан ман.
[ваттисен сӑмахӗ]
 

Таисия Ташней: Мӗншӗн этем этеме ытлашши?

Таисия Ташней22.12.2014 19:342248 хут пӑхнӑ

Этем, этеме ан пул ытлашши тесе ҫырнӑччӗ Митта Ваҫлейӗ «Анатри юрӑ» сӑввинче. Шӑпах ҫавӑн пирки шухӑша кайрӑм та эпӗ паян. Шухӑша путараканӗ ӗҫтешӗм пулчӗ. Иртнӗ эрнере вӑл упӑшкин асламӑшне пытарма кайнӑ. 89 ҫул тултариччен икӗ уйӑх пурӑнса ҫитереймен ватӑ хӑй вӑхӑтӗнче Тӑван ҫӗршывӑн вӑрҫине те хутшӑннӑ иккен. Ӗҫлеме вӑл Шупашкарти паллӑ предприятисенчен пӗринче тӑватӑ теҫетке ҫула яхӑн ӗҫленӗ. «Предприяти пуҫланса кайнӑ кунтанпах темелле», – ӗнентерет леш тӗнчене ӑсаннӑ кинемейӗн мӑнукӗн арӑмӗ.

Кинемей вилни пирки унӑн ҫывӑх ҫыннисем хайхи ӗмӗрне пӗр вырӑнта ӗҫлесе ирттернӗ организацие шӑнкӑравланӑ, юлашки ҫула ӑсатма пыма чӗннӗ. Пытарнӑ кун унтан никам та килменнине кура ӗҫтешӗм хӑй тепре шӑнкӑравланӑ. «Пӗлетпӗр, анчах халӗ пуҫлӑх канашлу ирттерет», – ӑнлантарнӑ мӑнкӑмӑллӑн ҫыруҫӑ. Пуҫлӑх сӗтелӗ ҫине чей кӗртсе лартма, унтан чей куркине ҫума, ҫырусем кӗртсе паракан ӗҫре тар тӑкакан ҫак ҫынсем хӑйсене питӗ мӑнаҫлӑн тытнинчен тӗлӗнмен-ха ӗҫтешӗм. «Апла тӗп бухгалтерпа калаҫасчӗ. Пирӗн асанне, мӗн тесен те, сирӗн патӑрта бухгалтерта ӗмӗрӗпе ӗҫленӗ. Тен, унтан кам та пулин килме кӑмӑл тӑвӗ», – тенӗ вӑл. Анчах ҫырувҫӑ тӗп бухгалтер та пуҫлӑхпа пӗрле канашланине пӗлтернӗ. Ӗҫтешӗм кунпах та лӑпланман-ха: «Эпир ӗнерех шӑнкӑравланине вӗсене пӗлтернӗ-и?» – кӑсӑкланнӑ вӑл. «Ҫапла!» – касса татнӑ пике. «Вӗсем мӗн терӗҫ?» – малалла тӗпченӗ ӗҫтешӗм. «Ним те каламанни пырас мар тенине пӗлтерет-тӗр», – оборона министрӗ евӗр тытнӑ ҫыруҫӑ.

«Мӗнле капла? Ветерансен шучӗ чакса пырать теҫҫӗ. Вӗсем пур – хӑнк та тумарӗҫ. Ҫитменнине, килес ҫул пирӗн ҫӗршыв Тӑван ҫӗршывӑн аслӑ вӑрҫинче ҫӗнтернӗренпе 70 ҫул ҫитнине палӑртма хатӗрленет», – ниепле те лӑпланаймасть ӗҫтешӗм.

Ҫапла, вӑл куна халалласа шкулсенче сочиненисем ҫыртарӗҫ, ӳкерчӗксен конкурсӗсене йӗркелӗҫ. Клубсемпе культура учрежденийӗсем ҫав датӑна халалласа юрласа ташлӗҫ, тӗрлӗ курав йӗркелӗҫ. Ватӑсене хисеплемелли пирки пысӑк сцена ҫине тухсах калаҫӗҫ. Анчах ҫынна хисеп тӑвасси патшалӑх хваттер панинче кӑна мар-тӑр. Чӑннипех хисеплени кӑштах тимлӗх уйӑрнинчен, тен, ытларах та курӑнать пулӗ.

Тепӗр тесен, этем ӗҫленӗ чухне кӑна кирлинчен тӗлӗнме кирлех-ши? Ӗҫленӗ чух та хисеплемеҫҫӗ те хӑш чухне, ӗҫлеме пӑрахсан сума сӑвассине кӗтме кирлех-ши? Ҫавӑнпа, тен, кӳренме те кирлӗ мар-тӑр…

 

Комментари:

bor1959 // 1039.8.4424
2014-12-22 20:11
Килĕшетĕп,хурлăхлă япала.Паянхи олигархсене пуйтарассишĕн ĕçлесе пурăннă ватăсем никама та кирлĕ мар(за редким исключением),ку пурне те паллă.Эпĕ те 5 уйăх каялла хунямана пытартăм.Вăл 40 çул ĕçленĕ çĕре шăнкăравласа пăхма сĕнчĕç мана,вара лерен каларĕç:документсене йĕркеллĕ пуçтарсан пĕр 1000 тенкĕ таран уйăрса пама пултаратпăр терĕç. Вăт çапларах "пултараканскерсем" пирĕн.
bor1959 // 1039.8.4424
2014-12-22 20:14
Зато пăх,Акасапар хăта, паянхи ИНТЕРНЕТгазета Чувашии. Мĕнлерех савăнаççĕ Мускавра ялхуçалăх министерствинче чăвашсене çаппа-çарамас хăваракан "чувашски" ĕçчешсем. Тимĕр хăтана та килĕшме кирлĕ.
Якур // 1804.62.9167
2014-12-29 00:41
Ытлашши кÿренме кирлĕ мар ман шутпа. Эпир социаллă улшăнусем, социумри çынсен кăмăлĕ лайăх енне хăвăртрах улшăнассине шанатпăр, анчах улшăнусен хăвăртлăхĕ пит начар.

Комментариле

Сирӗн ятӑp:
Анлӑлатса ҫырни:
B T U T Ячӗ1 Ячӗ2 Ячӗ3 # X2 X2 Ӳкерчӗк http://
WWW:
ӐӑӖӗҪҫӲӳ

Пурӗ кӗртнӗ: 0 симв. Чи пысӑк виҫе: 1200 симв.
Сирӗн чӑвашла ҫырма май паракан сарӑм (раскладка) ҫук пулсан ӑна КУНТАН илме пултаратӑр.

Эсир усӑ курма пултаракан Wiki тэгсем:

__...__ - сӑмаха каҫӑ евӗр тӑвасси.

__aaa|...__ - сӑмахӑн каҫине тепӗр сӑмахпа хатӗрлесси («...» вырӑнне «ааа» пулӗ).

__https://chuvash.org|...__ - сӑмах ҫине тулаш каҫӑ лартасси.

**...** - хулӑм шрифтпа палӑртасси.

~~...~~ - тайлӑк шрифтпа палӑртасси.

___...___ - аялтан чӗрнӗ йӗрпе палӑртасси.


Orphus

Баннерсем

Шутлавҫӑсем

 
Сайт пирки | Пулӑшу | Статистика
(c) 2005-2018 Chuvash.Org
Сайтри материалсене (ытти ҫӑлкуҫсенчен илнисемсӗр пуҫне) CreativeCommons Attribution-ShareAlike 3.0 лицензипе килӗшӳллӗн усӑ курма пулать. Сайтпа ҫыхӑннӑ ыйтусене кунта ярӑр: site(a)chuvash.org