Раҫҫей Украинӑн Хӗвелтухӑҫ пайне референдума куҫарма сӗннине унтисем ӑша хывманнине Кремль тишкересшӗн иккен. Аса илтеретпӗр, Донецк халӑх репсублики ӑна ҫу уйӑхӗн 11-мӗшӗнче ирттерме палӑртнӑ. Анчах Раҫҫей Президенчӗ Владимир Путин ун пек васкама кирлӗ мар, енсен – Украинӑн хальхи влаҫӗсем калаҫса татӑлсан аван тесе сӗннӗ. Анчах Украинӑн Хӗвелтухӑҫ пайӗ референдум кунне куҫарас темен. Кун пирки ИТАР-ТАСС информаци агентстви пӗлтерет. Луганск облаҫӗнче те региона федерализацилес ыйтупа асӑннӑ кун референдум ирттерме палӑртнӑ.

Украина тенӗрен, ҫӗршыв Президенчӗн пресс-секретарӗ Дмитрий каланӑ тӑрӑх, Раҫҫей Европӑн хӑрушсӑрлӑхӗ енӗпе ӗҫлекен организаци Украинӑри лару-тӑрӑва йӗркелеме дипломати каналӗсем урлӑ «ҫул-йӗр картти» илнине пӗлтернӗ. Халӗ ӑна пирӗн ҫӗршыв тишкересшӗн-мӗн.

Евросоюзӑн ют ҫӗршыв ӗҫӗсен тата хӑрушсӑрлӑх политики енӗпе ӗҫлекен аслӑ элчи Майя Косьянович Путин каланине Украинӑри лару-тӑрӑва ҫивӗчлетме пултарать тесе хакланӑ-мӗн. Еврокомисси тата Евросоюзӑн тулаш политикн служби ҫу уйӑхӗн 11-мӗшӗнче Украинӑра референдум иртмелле мар тесе шухӑшлаҫҫӗ иккен. Вӗсем Украинӑн «суверенечӗпе территори пайланманлӑхне» ырланине пӗлтернӗ.