rg.ru сайтри сӑн

Шупашкарти общество транспортӗнче Чӑваш Енри паллӑ ҫынсем пирки каласа кӑтартма пуҫласси пирки пӗлтернӗччӗ. «Тӑван ятсем» проект пурнӑҫланма тытӑннӑ ӗнтӗ. Унӑн авторӗ – Анжелика Иванова.

Хальлӗхе паллӑ ҫынсем Шупашкарти пирки 5 троллейбусра тата 5 автобусра каласа кӑтартаҫҫӗ. Пӗр-пӗр паллӑ ҫын ячӗпе хисепленекен чарӑнӑва ҫитиччен ун пирки мини-лекци итлеме пулать.

Анжелика Иванова паллӑ ҫынсем пирки информаци пухас тӗллевпе архивсенче, вулавӑшсенче сахал мар ларнӑ. Пысӑк биографирен чи кӑсӑклине ҫеҫ илме май пулнӑ, мӗншӗн тесен троллейбус чарӑнуран питӗ хӑвӑрт иртсе каять.

Эсир 1981 ҫулччен Николай Бауман революционер урамӗ хальхи пек ҫӗнӗ кӑнтӑр районӗнче мар, кӳлмекреп пулнине пӗлнӗ-и? 1-мӗш троллейбуспа ҫӳрекенсем вара халӗ пӗлеҫҫӗ. Ҫапла, питӗ интереслӗ проект ку.

zen.yandex сайтри сӑн

Шупашкарта пурӑнакан арҫын укҫа хывса пуяс тенӗ те темӗн чухлех парӑма кӗрсе кайнӑ. Халӗ унӑн банка, пӗлӗшӗсене укҫа парса татмалла.

Йӑлтах халӑх тетелӗнче укҫа хӑвӑрт ӗҫлесе илмелли пирки хыпарланӑ пӗлтерӗве курнинчен пуҫланнӑ. Вӑл унта хӑйӗн номерне хӑварнӑ. Часах унпа суя брокерсем ҫыхӑннӑ.

Арҫын вӗсем каланипе биржа патне кӗме май пултӑр тесе телефонӗ ҫине сарӑм вырнаҫтарнӑ, счечӗ ҫине 15 пин тенкӗ хунӑ. Кун хыҫҫӑн ӑна пысӑкрах укҫапа выляма сӗннӗ. Арҫын банкран кредит илнӗ, пӗлӗшӗсенчен укҫа ыйтнӑ. Ҫапла вӑл ултавҫӑсене 2 миллион та 960 пин тенкӗ куҫарса панӑ.

Анчах арҫын укҫа-тенке каялла тавӑрайман. Ултавҫӑсен аллине лекнине ӑнлансан вӑл полицие кайса пулӑшу ыйтнӑ. Кун тӗлӗшпе йӗрке хуралҫисем пуҫиле ӗҫ пуҫарнӑ.

Следстви комитечӗ тунӑ сӑн

Юпа уйӑхӗн 12-мӗшӗнче, пӗлтӗр, 28 ҫулти хӗрарӑм Шупашкарта Богдан Хмельницкий урамӗнчи чарӑнура маршруткӑна ларнӑ та кӑшт кайсан водителе мӑйӗнчен ҫӗҫӗпе чикнӗ. Тепӗр маршрутка водителӗ пулӑшнипе, шӑп ҫав вӑхӑтра иртсе пыракан васкавлӑ медпулӑшу чарӑннипе руль умӗнче ларнӑ арҫынна часах пульницӑна илсе ҫитернӗ, операци тунӑ. Вӑл чӗрех юлнӑ.

28 ҫулти хӗрарӑма вара тытса чарнӑ. Ҫынна вӗлерме тӑнӑшӑн ун тӗлӗшпе пуҫиле ӗҫ пуҫарнӑ. Тытса чарнӑ чухне вӑл йӗрке хуралҫисене хирӗҫлеме те шухӑшламан. Аманнӑ водителе пулӑшу кӳнине ҫул айккинче пӑхса тӑнӑ. Ҫак арҫынна вӑл унччен палламан. Чарӑнура маршруткӑн малти ларкӑчӗ ҫине вырнаҫсан пӗр кӗтмен ҫӗртен ҫӗҫӗпе яшлаттарнӑ.

Следстви вӑхӑтӗнче психиатри экспертизи тунӑ. Вӑл ҫакна кӑтартнӑ: ҫамрӑк хӗрарӑм преступлени вӑхӑтӗнче хӑй мӗн тунине ӑнланман. Ҫавна май суд ӑна ятарлӑ учреждение сипленмешкӗн яма йышӑннӑ.

Шупашкар хула администрацийӗ общество транспорчӗн икӗ чарӑнӑвӗн ятне улӑштарма сӗнет. Ку тӗллевпе «Уҫӑ хула» порталта ятарласа сасӑлав иртет.

«Ҫыхӑну техникумӗ» чарӑнӑва «Пултаруллӑ ачасемпе ҫамрӑксен «Эткер» центрӗ» теесшӗн. «Металлист» савута вара «Шупашкарти МГЭУ институт /филиал/ ят пама сӗнеҫҫӗ.

Ку пуҫару – Шупашкар хулин депутатсен пухӑвӗн депутачӗн Евгений Петровӑн. Ун патне чарӑнусен ятне улӑштарсси пирки сӗнӳсем килнӗ-мӗн. Сӑмах май, Ҫыхӑну техникумӗ халӗ ҫук ӗнтӗ.

Шупашкрати Павлов мичман урамӗнчи 62-мӗш ҫуртра лифтсем ӗҫлеме пӑрахнӑ. Йӑлтах вӑрӑсене пула.

Такамсем 2-мӗш, 3-мӗш тата 4-мӗш подъездри лифтсен пайӗсене вӑрласа кайнӑ. Вӗсем вара йӳнӗ тӑмаҫҫӗ. Ҫавна май лифтсем хӑҫан ӗҫлесе каясси паллӑ мар-ха. Палӑртмалла: ҫуртра пӗтӗмпе тӑватӑ подъезд.

Йӗрке хуралҫисем кун тӗлӗшпе следстви умӗнхи тӗрӗслев ирттереҫҫӗ. Вӗсем палламан ҫынсене, хӑйсене урӑхла тытакансене, курсан кун пирки полицие пӗлтерме ыйтаҫҫӗ.

Инстаграмри @cson_cheb сӑнӳкерчӗк

Шупашкар хула администрацийӗнче ӗҫлекенсем кирлӗ. Чебоксары.рф сайтра 30 ытла ваканси вырнаҫтарнӑ.

Хула администрацийӗн структура подразделенийӗсенче специалистсем тата ертсе пыракансем кирлӗ.

Ӗҫне кура укҫи темелле-тӗр. Шалу виҫи тӗрлӗрен. 20 пин те тӳлеҫҫӗ, 30 пин те, 65 пин те. Ку вӑл епле тивӗҫе пурнӑҫланинчен килет.

Хула администрацийӗн пресс-служби вакансисем пуррине Инстаграмри хӑйӗн страницинче хыпарланӑ. Сӑмах май каласан, малтанласа кадр резервне те заявка хӑварма пулать.

Нумаях пулмасть ирттернӗ пресс-конференцире хула администрацийӗн пуҫлӑхӗ Денис Спирин хӑйсен ӗҫне критиклекенсене ӗҫе чӗннӗччӗ.

⠀

Ватӑ хӗрарӑм хӗрне ҫӑлас тесе ултавҫӑсене чутах 700 пин куҫарса паман. Ку Шупашкарта пулса иртнӗ.

75 ҫулти хӗрарӑм каласа кӑтартнӑ тӑрӑх, нарӑсӑн 4-мӗшӗнче килти телефонӗ ҫине хӗрӗ шӑнкӑравланӑ имӗш, ҫул ҫинче аварие лекни пирки, ыйтӑва татса пама 700 пин кирли ҫинчен каланӑ.

Хӗрарӑм хӗрне пулӑшас тесе банка кайнӑ, укҫине илнӗ те ӑна куҫарса пама тӑнӑ. Анчах ун патне хӗрӗ шӑнкӑравланӑ – унпа нимӗн те пулса иртмен иккен. Кун хыҫҫӑн ватӑскер укҫана каялла счет ҫине хунӑ та кун пирки полицие пӗлтернӗ.

71 ҫулти хӗрарӑм вара ултавҫӑсен аллине лекнӗ. Хӗрне ҫӑлас тесе вӑл палламан арҫынна хӗрӗн япалисене, пухнӑ пӗтӗм укҫине – 500 тенке – парса янӑ.

forum.na-svyazi.ru сайтри сӑн

Шупашкарта пурӑнакан арҫын хваттерте газ колонкине улӑштарма тӑнӑ та ҫуртри пӗтӗм ҫынна газсӑр хӑварнӑ.

Ку Энтузиастсен урамӗнчи 9-мӗш ҫуртра пулнӑ. Арҫын шыва тата газа сыпӑнтармалли пӑрӑхсене арпаштарса янӑ. Ҫавна пула газ пӑрӑхӗ шывпа тулнӑ, ҫурт газсӑр тӑрса юлнӑ.

Арҫын тӗлӗшпе пуҫиле ӗҫ пуҫарнӑ. Унӑн газа ҫӗнӗрен ярассипе ҫыхӑннӑ тӑкаксене саплаштарма тивӗ.

Сӑмах май, кун пекки унччен те пулнӑ. Ҫӗнтерӳ лапамӗнчи 5-мӗш ҫуртра пӗр ҫын газ колонкине улӑштарса пӑрӑхсене арпаштарса янӑ.

orenburg.bezformata.com сайтри сӑн

Почта уйрӑмӗнче пуҫлӑхра ӗҫленӗ хӗрарӑм упӑшкине хӑйӗн ӗҫне вырнаҫтарнӑ. Анчах лешӗ ӗҫлемесӗрех укҫа илсе тӑнӑ. Ку кӑна мар, пенси стажӗ те пынӑ.

2020 ҫулхи кӑрлач-ҫурла уйӑхӗсенче почта уйрӑмӗн пуҫлӑхӗн упӑшки унта почтальонра ӗҫленӗ имӗш. Арӑме ӗҫ вӑхӑчӗн табельне ҫырса пынӑ. Официаллӑ документсене чӑнлӑхпа пӗр килмен даннӑйсене ҫырнӑ.

Хӗрарӑм тӗлӗшпе пуҫиле ӗҫ пуҫарнӑ. Анчах вӑл унччен судпа айӑпланманнине, айӑпне йышӑннине кура пуҫиле ӗҫе чарса лартнӑ, 25 пин тенкӗ суд штрафӗ тӳлеттернӗ.

Хӗрарӑм ҫавӑнтах ӗҫлет-мӗн, анчах пуҫлӑхра мар, ахаль ӗҫчен пек

2022 ҫултанпа Раҫҫейре зоопарксене, цирксене ҫӗнӗ йӗркепе ӗҫлеттермелли саккунсем вӑя кӗнӗ. Ҫавна май Шупашкарти "Ковчег" зоокӗтӗс нарӑс уйӑхӗн 3-мӗшӗнче лицензи илнӗ. Вӑл сроксӑр пулӗ.

Пӗлтӗр раштав уйӑхӗнче зоокӗтесе Роспотребнадзор ӗҫченӗсем тӗрӗсленӗ. Лицензи илме ирӗк панӑ. Зоокӗтес директорӗн тивӗҫӗсене пурнӑҫлакан Надежда Айвенова Шупашкарти ҫак вырӑн аталанассине, унта тӗрлӗ мероприяти иртессине пӗлтернӗ. Ҫитес вӑхӑтра вӗсем ҫӳлевӗҫ туянасшӑн.

Палӑртса хӑварар: зоокӗтес 2010 ҫултанпа ӗҫлет. Унта халӗ 150 ытла чӗрчунпа 40 ытла кайӑк-кӗшӗк пур. Зоокӗтес юнкунран пуҫласа шӑматкунччен 10-18 сехетсенче ӗҫлет. Сӑмах май вӑл республикӑра лицензи илнӗ иккӗмӗш зоопарк. Пӗрремӗшӗ - Ҫӗнӗ Шупашкарти Тӗкӗрҫ ращинчи зоопарк.