Ҫӗртме уйӑхӗн 12-мӗшӗнче каҫхи 7 сехет ҫурӑра ҪҪХПИ ӗҫченӗсем Chevrolet Niva урапана чарнӑ. Водитель ахаль ҫул ҫинчен тӗп ҫул ҫине тухма хӑтланнӑ ун чухне.

Руль умӗнчи арҫын права вырӑнне удостоверени кӑтартнӑ-мӗн. Правана манса хӑварнӑ имӗш. Удостоверени вара Комсомольски район администрацийӗн пуҫлӑхӗ пулнине ӗнентерет.

Михаил Афанасьев эрех ӗҫнине пытарман. Хӑй тӗрлӗ ертӳлӗх патне шӑнкӑравласа ҫитме хӑтланнӑ. Унтан освидетельствовани тухма хирӗҫ пулнӑ.

Хӑй каланӑ тӑрӑх, унӑн ялне ҫити 3 ҫухрӑм ҫеҫ каймалла пулнӑ. ҪҪХПИ ӗҫченӗсем вара административлӑ 3 материал ҫырнӑ: руль умне документсӑр ларнӑшӑн, путевкӑсӑр ҫӳренӗшӗн (урапа район администрацийӗн шутланать) тата освидетельствовани тухма хирӗҫленӗшӗн.

#тӳре-шара, #Комсомольски районӗ, #ҫул-йӗр, #пӑтӑрмахсем