Республикӑри пур хулапа ял халӑхӗ те Аслӑ Ҫӗнтерӳ 70 ҫул тултарнине кӗтсе илме хатӗрленет. Ялсемпе хуласенче вӑрҫӑран таврӑнайманнисене чысласа лартнӑ палӑксене, асӑну хӑмисене сӑрласа ҫӗнетессипе тимлеҫҫӗ, палӑксем йӗри-тавра чечексем лартса илемлетеҫҫӗ. Республикӑри ялсемпе хуласенче вӑрҫӑ паттӑрӗсене чысласа сирень аллейисем лартрӗҫ. Хаҫат-журналта кулленех вӑрҫӑра паттӑрлӑх кӑтартнӑ салтаксем ҫинчен интереслӗ материалсем пичетленеҫҫӗ. Юрӑҫсем тӳлевсӗр концертсемпе ялсем тӑрӑх ҫӳреме тытӑнчӗҫ.Кашниех ҫак сумлӑ уява тивӗҫлипе кӗтсе илме хатӗрленет.

Етӗрне районӗнчи Кӑкшӑм ял тӑрӑхӗнчи Кӑкшӑмра тата Ҫуткасси ялӗсенче ҫӗкленӗ палӑксене те ҫак кунсенче юсаса ҫӗнӗ сӑн кӗртрӗҫ. Унсӑр пуҫне Ҫӗнтерӳ кунӗнче «Заветы Ильича» (чӑв. Ильич халалӗ) колхозра ӗмӗрӗпе тӑрӑшнӑ, тивӗҫлӗ канӑва тухиччен 16 ҫул хушши колхоз ертӳҫи пулса кунне-ҫӗрне пӗлмесӗр ӗҫленӗ Хисеплӗ председателе, Чӑваш АССР тата РСФСР тава тивӗҫлӗ агрономне, ӗҫ ветеранне, чылай медаль тата темиҫе орден кавалерне Александров Вячеслав Александровича (1929-2005) чысласа Асӑну хӑми уҫма палӑртнӑ. Кӑкшӑм ял администраци пуҫлӑхӗ Михайлов Константин Николаевич уявра халӑх асӗнче хӑйӗн ырӑ ӗҫӗсемпе асра юлнӑ Вячеслав Александровича хисеплекенсем тата асра тытакансем пухӑнасса шанать.

Александров В.А. Красноармейски районӗнчи Тусай ялӗнче ҫуралнӑ, вӑрҫӑ нушисене мӗнпур совет халӑхӗпе тан тӳссе ирттернӗ, 18 ҫулта вӑрҫӑ вӑхӑтӗнче хастар ӗҫленӗшӗн (шкул ачи шкула ҫӳремесӗр ҫулталӑк хушши колхозра выльӑхсем пӑхнӑ) медаль илме тивӗҫлӗ пулнӑ.

Сӑнсем (8)

#Тусай, #Красноармейски районӗ, #асӑну хӑмисем, #Кӑкшӑм, #Кӑкшӑм ял тӑрӑхӗ, #Ҫуткасси, #Етӗрне районӗ, #Ҫӗнтерӳ кунӗ