Етӗрне районӗнчи Кӑкшӑм ялӗнче кӑҫалхипе вуннӑмӗш хут Чечен Республикинче пуҫне хунӑ Иванов Анатолий Геннадьевича асӑнса йӗлтӗрпе чупассипе ӑмӑртусем иртнӗ. Унта пурӗ 120 спортсмен хутшӑнчӗ.

Малтанах спортсменсем Кӑкшӑм шкулӗн спортзалне линейкӑна йӗркеленсе тӑнӑ. Пухӑннисем умӗнче Кӑкшӑм ял тӑрӑхӗн ертӳҫи Константин Михайлов, Кӑкшӑм шкул директорӗ А.М.Иванов, Етӗрнери афган вӑрҫин ветеранӗсен обществин представителӗ Н.И.Кириллов, Етӗрнери социаллӑ пайӗн специалист-эксперчӗ И.А. Семенов тата ыттисем Иванов ячӗпе иртекен ӑмӑртура пурне те Анатолий пек хастар пулма, ҫирӗплӗх, ӑнӑҫусем сунчӗҫ.

Унтан пурте Раҫҫей гимнӗ янӑранӑ хыҫҫӑн паттӑр салтака асӑнса пӗр минут шӑп тӑчӗҫ.

Калиса Михайловна, Анатолин амӑшӗ, пухӑннисене хӑйӗн ывӑлне манса кайманшӑн куҫҫуль витӗр тав турӗ, ӑмӑрту йӗркелекенсене асӑнмалӑх парнесем пачӗ. Е.В. Лобастова ертсе пыракан Кӑкшӑм шкулӗнчи ташӑ ушкӑнӗ хӑнасене ташӑпа саламларӗ.

Чи кӗҫӗннисем — пӗрремӗш класра вӗренекен Алеша Ивановпа Маша Жандарова. Чи асли — Ирҫе ял тӑрӑхӗнчи 80 ҫулхи Тимофеев Александр Степанович. Ӑмӑртура кӳршӗри Палтайри, Мӑн Чурашри, Етӗрнери 2-мӗш, Тури Ачакри вӑтам шкулсенчи командӑсем, Кӑкшӑмри, Тинкешри пӗтӗмӗшле пӗлӳ паракан шкул спортсменӗсем хастар пулчӗҫ. Кирпӗч савучӗн, Етӗрнери полицин, тӗп пульницӑн ӗҫченӗсен командисем, ҫавӑн пекех Советски, Кӑкшӑм, Урпаш, Мучар тата Етӗрне ял тӑрӑхӗсен пӗрлештернӗ командисем ӑмӑртӑва хастар хутшӑнчӗҫ.

Ӑмӑртура мала тухнӑ кашни йӗлтӗрҫӗ Хисеп хучӗ, медаль, асӑнмалӑх парне тата Андрей Барабановӑн «Рождение звезды» ятлӑ диск илме тивӗҫлӗ пулчӗ.

Ӑмӑртӑва йӗркелеме Кӑкшӑм ял тӑрӑхӗн администрацийӗ, Анатолий тӑванӗсем, Етӗрнери афганецсен обществи, Кӑкшӑм шкулӗн коллективӗ пулӑшнӑ.

Сӑнсем (136)

#Тури Ачак, #Палтай, #Мӑн Чураш, #Етӗрне, #Ирҫе, #шкулсем, #Етӗрне районӗ, #йӗлтӗрпе чупасси, #спорт, #Кӑкшӑм, #Шӑмат, #Кӑкшӑм, #Урпаш, #Мучар