Кӑҫал Чӑваш Енре Константин Иванов ҫулталӑкӗ пулнӑ май ҫул пуҫлансанах ЧНК хастарӗсем поэт ҫуралнӑ тӑрӑха — Пушкӑртстанри Слакпуҫ ялне — ҫитсе килнӗ. Унта ку ҫулталӑка ҫӳллӗ шайра ирттерессине сӳтсе явнӑ.

Делегацие Слакпуҫ ял тӑрӑхӗн пуҫлӑхӗ Олег Беляев, шкул директорӗ Ольга Иванова ӑшшӑн кӗтсе илнӗ. ЧНК президиумӗн пайташӗ Эдуард Бахмисов ҫу уйӑхӗнче Слакпуҫра уява тӗнче шайӗнче ирттерме май пуррине пӗлтернӗ.

ЧНКан культура комитечӗн ертӳҫи Зинаида Воронова конгресс чӑваш культурине мӗнле аталантарни пирки каласа кӑтартнӑ. Вӗсем слакпуҫсене те пулӑшма хатӗр-мӗн.

Нина Пӑрчӑканпа Лидия Сарине слакпуҫсене хӑйсен сӑввисене вуласа панӑ. Куславкка районӗнчи Энтри Пасар ялӗнчи шкулта вӗрентекенре ӗҫлекенсем шкулта К.Иванов ҫулталӑкне мӗнле ирттерессипе паллаштрнӑ. Комсомольски районӗнчи «Каҫал» ушкӑн ертӳҫи купӑсне тӑсса янӑ та слакпуҫсем хӗрӳллӗн алӑ ҫупнӑ.

Тепӗр кун ЧНК хастарӗсем Слакпуҫри музейпе паллашнӑ. Кӑнтӑрла шкула ҫавра сӗтеле пухӑннӑ. Слакпуҫ шкулӗнче ӗҫлекенсем Чӑвашран килнӗ хӑнасен опычӗпе паллашнӑ.

Пелепейри чӑваш гимназийӗн вӗрентекенӗ Алексей Емельянов сӑвӑҫ ҫавра сӗтелре уява нимелле ирттерме чӗнсе каланӑ. Ямал-Ненец автономи округӗнчи Муравленко хулинчен килнӗ Анатолий Ефремов уяв валли ятарлӑ счет уҫма сӗннӗ. Ку ӗҫе Ҫӗпӗрте пурӑнакан чӑвашсене явӑҫтарас ӗҫе вӑл хӑй ҫине илме хатӗр-мӗн.

ЧНК хастарӗсемпе слакпуҫсем тулли кӑмӑлпа уйрӑлнӑ.

#ЧНК, #Пушкӑртстан, #Слакпуҫ, #ҫавра сӗтелсем, #Пелепей, #Куславкка районӗ, #культура, #Константин Иванов ҫулталӑкӗ, #Энтри Пасар, #Комсомольски районӗ, #музейсем