Трак ене Мускавран савӑнӑҫлӑ хыпар ҫитрӗ: Пӗтӗм тӗнчери «Симӗс планета» экологи форумӗ ирттерекен конкурсӑн лауреачӗсене пӗлтерчӗҫ. Вӗсенчен пӗри — Красноармейски иккӗмӗш шкулӗнче 9-мӗш класра вӗренекен Михайлов Алексей (сӑмах май, вӑл «Трак ен» сайтӑн администраторӗ те). Алеша хӑйӗн «Вӑрмана хӳтӗлер» сайчӗпе «Хальхи технологисем - ҫутҫанталӑка хӳтӗлес ӗҫре" (экологи тата ҫут ҫанталӑка хӳтӗлес темӑпа хатӗрленӗ сайтсен тата Internetри web-страницӑсен конкурсӗ) ятлӑ номинацире лауреат ятне ҫӗнсе илнӗ. Ку проект ӗҫӗн ертӳҫи — ҫак шкули обществознани предметне вӗрентекен Михайлов В.М.

Ҫавӑн пекех Пӗтӗм Раҫҫейри «Симӗс планета — 2009» форумра «Вӑрман пурнӑҫӗ тата ҫын шӑпи» (литература конкурсӗ) номинацире Жукова Анастасия (Трак чӑвашла-нимӗҫле гимнази) тата Михайлова Татьяна (Шывпуҫ шкулӗ) лауреат пулса тӑнӑ.

Конкурс оргкомитетне пултарулӑх ӗҫӗсене Раҫҫейри 73 регионтан тата тӗрлӗ ют ҫӗршывран тӑратнӑ. Ҫав шутра: Арменирен, Беларуҫран, Болгарирен, Бразилирен, Индирен, Италирен, Казахстанран, Кипртан, Китайран, Молдовӑран, Румынирен, Словакирен, Туркменистанран, Турцинчен, Узбекистанран, Украинӑран, Уругвайран. Конкурсӑн вырӑнти тапхӑрӗнче 150 000 ача хутшӑннӑ. Чӑваш уйрӑмӗн «Симӗс планета» экологи юхӑмӗнчен Пӗтӗм Раҫҫей шайӗнче ҫак конкурса 45 ача хутшӑннӑ. Вӗсенчен 15-шӗ тӗрлӗ шайри ҫӗнтерӳҫӗ-лауреат пулса тӑнӑ: 8-шӗ Пӗтӗм Раҫҫейри форум ҫӗнтерӳҫи, 7-шӗ — Пӗтӗм тӗнчери форум ҫӗнтерӳҫи.

Пӗтӗм чун-чӗререн саламлатпӑр!

Хыпар ҫӑлкуҫӗсем: 1, http://gov.cap.ru/list4/news/rec.aspx?id=8897432, http://www.greenplaneta.ru/node/14683_

#Красноармейски, #сайтсем, #ҫитӗнӳсем, #Красноармейски районӗ