Ҫӗртмен 20-мӗшӗнче Лапсар ял тӑрӑхӗнче «Акатуй» иртрӗ. Ку тӑрӑха тӑхӑр ял кӗрет — Лапсар, Асакасси, Вӑрманкас, Карачура, Ойкасси, Ҫатракасси, Ҫӗньял, Хӗрлӗ Ҫыр, Чӑркаш. Ҫанталӑкӗ уҫӑрах тӑчӗ пулин те Ҫатракасси ялӗн ҫӳмӗнче вырнаҫ шкул стадионне халӑх самаях пухӑнчӗ. Тен ытларах та пухӑнӗччӗ пулӗ те — хӑш-пӗр ҫынсене ял ӗҫӗ уява ямарӗ пулас: уттине те типӗтмелле, ҫӗрулмине те купаламалла, канмалли кунра ҫурт-йӗре юсас ӗҫсене те туса пымалла.

Уява халӑх пултарулӑх ушкӑнӗсем уҫрӗҫ — Вӑрманкас клубӗнчи «Парне», тата кӑнтӑр поҫёлокӗнчи «Шевле» ушкӑнсем. «Акатуя» ертсе пыраканӗ Варманкасри фольклор ҫурчӗн ертӳҫи Маргарита Анатольевна Владимирова пулчӗ.

Уйкассинчи Ильина Нина Ефремовнӑпа Сайкова Лариса, Ҫатра-Лапсар шкулӗнче вӗренекен хӗр пӗрчисем, Ҫеньялти Фёдорова Ксения Анатольевна та хӑйсен пултарулӑхӗпе савӑнтарчӗҫ. Ксения Анатольевна уява йӗркелес ӗҫе те хастар хутшӑнчӗ — парнесем парас ӗҫре пулӑшрӗ.

Лапсар ял тӑрӑхӗн пуҫлӑхӗ Евгений Афанасьев 2008 ҫулта туса ирттернӗ ӗҫсемпе паллаштарчӗ: кашни яла халӗ асфальт ҫул ҫитет, Ҫӑтракассипе Лапсарта ӑпӑр-тапӑр тӑкнӑ вырӑнсене тӑпрапа хупласа йывӑҫсем лартнӑ. Кӑҫал та ҫул сарас ыйтупа самай ӗҫлемелли пирки каласа хӑварчӗ — ял тӑрӑхӗн администрацийӗ вырнаҫнӑ урамри ҫула сармалла, тата ҫын утмашкӑн тротуар хывса пӗтермелле. Ыр сӑмахпа «Парне» халӑх юррипе ташши ушкӑнне, тата ял тӑрӑхӗн ӗҫне хастар хутшӑнакан ҫынсене асӑнчӗ, вӗсене хисеп хучӗ тата парне парса чысларӗ.

Малалла уява «Янташ» ушкӑн тӑсрӗ — хӑйсен юррипе тата кулӑшӗпе халӑха савӑнтарчӗ. Эстрада ушкӑнӗн юррисем халӑх кӑмӑлне кайрӗҫ — вӗсем юрланӑ вӑхӑтра халӑх ташларӗ, юрларӗ. Юратнӑ артистсене халӑх юрӑ хыҫҫӑн юрӑ юрлаттарасшӑн пулчӗ. Юлашкинчен «Янташ» ушкӑнӗн ертӳҫи Никитин та чӑтаймарӗ, ушкӑна кӗрекен юрӑҫсемпе пӗрле хӑй те тухса юрӑ юрласа пачӗ. Ҫапла кӑмӑллӑ кӗтсе илнишӗн «Янташ» ушкӑнӗ тепер ҫул та килме сӑмах пачӗ.

Уяв футбол ӑмӑртӑвӗпе вӗҫленчӗ. Унта пурӗ 4 команда хутшӑнчӗ.

Уяври сӑнӳкерчӗксем

#Чӑркаш, #Хӗрлӗ Ҫыр, #Ҫеньял, #Ҫатракасси, #Ойкасси, #Карачура, #Вӑрманкас, #Асакасси, #Лапсар, #Янташ, #Акатуй, #Лапсар ял тӑрӑхӗ, #шкулсем, #ушкӑнсем, #уявсем, #футбол, #спорт