2009 ҫулхи мартӑн 24-мӗшӗнче «Суварӑн» штатра тӑман корреспонденчӗ, Тутарстанри чӑвашсен «Ҫичӗ ҫӑл», каярах «Салам» радиокӑларӑмсене пуҫарса ертсе пынӑ Петр Михайлович Миров (Сандимиров) вӑхӑтсӑр вилсе кайнӑ.

П.М.Миров Нурлат районӗнчи Салтакьелӗнче ҫуралса ӳснӗ. Якаелӗнчи вӑтам шкултан вӗренсе тухсан Самар облаҫӗнчи ял хуҫалӑх техникумне кайса кӗнӗ. Диплом илнӗ хыҫҫӑн пӗр вӑхӑт Самар облаҫӗнчи Пестровка районӗнче колхоз председателӗн тивӗҫӗсене туса пынӑ. Салтака кайсан Львоври аслӑ политучилищӗре вӗреннӗ, ӑна пӗтерсен 25 ҫул ҫар журналисчӗ пулса тӗрлӗ хаҫатсенче ӗҫленӗ. Хӗвел Анӑҫ Украина, Кавказ, Германи, Венгри, Ҫӗпӗр, Байкал леш енӗ, Атӑл тӑрӑхӗ – таҫта та ҫитнӗ журналист, нумай чӗлхепе калаҫма вӗреннӗ, анчах ашшӗ-амӑшӗ панӑ тӑван чӗлхене темӗнле аякри ют ҫӗршыва ҫитсен те манман.

Отставкӑна тухсан Петр Михайлович чӑваш культурине «вӑратса» аталантарас ӗҫе кӳлӗннӗ. Вӑл тӑрӑшнипе Хусан радиохумӗнче 1992 ҫулта чӑвашла «Ҫичӗ ҫӑл» передача эфира тухма пуҫлать, каярах вӑл «Салам» ятпа тухма тытӑнчӗ. Пиншер чӑваш П.Миров сассине (хӑйне нихӑҫан та курманнисем те) тӳрех уйӑрса илетчӗ, чунра кӳтсе килнисем ҫинчен ҫырура ҫырса пӗлтеретчӗ е савӑнӑҫпа тулнӑ чӗрине уҫса паратчӗ.

«Ҫичӗ ҫӑл» («Салам») итлекенсем – «Сувар» вулакансем, Петр Михайлович вӗсемпе Тутарстан чӑвашӗсен хаҫачӗ урлӑ та ҫыхӑну тытнӑ, ҫамрӑксене мораль принципӗсене ҫӳле ҫӗклеме вӗрентсе очерксем те, калавсем те пайтах ҫырнӑ. Ҫырӑнтару кампанийӗсем пуҫлансан вара кашни радиокӑларӑмрах «Сувар» хаҫата ҫырӑнма чӗннӗ.

Чӑваш наци культурине аталантарма пысӑк тӳпе кӗртнӗшӗн Петр Михайлович Мирова (Сандимирова) «Тутарстан тата Чӑваш Ен Республикисен культурӑн тава тивӗҫлӗ ӗҫченӗ» ят парса хавхалантарнӑ.

П.М.Мирова мартӑн 26-мӗшӗнче Вӑрмар районӗнчи (Чӑваш Ен) Кивӗ Вӑрмар ялӗн масарне пытараҫҫӗ.

П.М.Миров (Сандимиров) вӑхӑтсӑр вилсе кайнишӗн тӑванӗсемпе, ҫывӑх ҫыннисемпе пӗрле тарӑннӑн хурланни ҫинчен пӗлтеретпӗр. Унӑн ҫутӑ сӑнарӗ яланах пирӗн асра упранӗ.

ТР ЧНКА Ӗҫтӑвкомӗ, Хусанти П.Хусанкай ячӗллӗ ЧОКЦ, «Сувар» хаҫат редакцийӗ.

Хыпар ҫӑлкуҫӗ

#Нурлат районӗ, #ҫухатусем, #Салтакьел, #Тутарстан, #Вӑрмар районӗ