Элӗксем хӑнасене ҫӑкӑр-тӑварпа кӗтсе илнӗ

Ӗнер Элӗк районӗ те Акатуя пухӑннӑ. Унта ЧР Министрсен Кабинечӗн председателӗн ҫумӗ, ЧР сывлӑх министрӗ Алла Самойлова, ЧР ял хуҫалӑх министрӗн ҫумӗ Николай Якимов, ЧР Патшалӑх Канашӗн депутачӗ Владимир Мидуков тата ытти сумлӑ хӑна ҫитнӗ.

Район администрацийӗн пуҫлӑхӗ Александр Куликов ака-сухана пӗтӗмлетнӗ. Кӑҫал элӗксем ӑна ӑнӑҫлӑ, вӑхӑтра вӗҫленӗ. Ҫавӑн пекех вӑл ентешӗсене Раҫҫей кунӗпе те саламланӑ.

Алла Самойлова элӗксене ЧР Элтеперӗ Михаил Игнатьев ятӗнчен саламланӑ. «Новый путь» ЯХПК председательне Иван Николаева, «Раҫҫей ял хуҫалӑх центрӗн» Элӗк районӗнчи филиалӗн агрономне Надежда Прохоровӑна ЧР Ял хуҫалӑх министерствин Хисеп грамотипе чысланӑ.

«Новый путь» ЯХПК инженерне Алексей Михайлова, склад заведующийне Евгений Максимов, «Раҫҫей ял хуҫалӑх центрӗн» Элӗк районӗнчи филиалӗн ертсе пыракан агрономне Надежда Афанасьевӑна, «Журавлев» фермер хуҫалӑхӗн тӗп инженерне Михаил Петрова, «Авангард» ЯХПК трактористне Геннадий Трофимова, «Новый путь» ЯХПКн ӗне сӑвакан операторне Зинаида Багоровӑна, Ульянов ячӗллӗ ЯХПКн ӗне сӑвакан операторне Людмила Сергеевӑна та ЧР Ял хуҫалӑх министерствин Хисеп грамотипе чысланӑ. Тавӑтри В.С.Марков ячӗллӗ шкулти вӑй-хал культурине вӗрентекенне Николай Васильева «ЧР тава тивӗҫлӗ вӗрентекенӗ» ята панӑ.

Фермер ӗҫне тинтерех пуҫӑннӑ Сергей Романова тата Александр Михайлова 1 100 000 тенкӗлӗх грант панӑ. Элӗк шкулӗнче пуҫламӑш классене вӗрентекен Фаина Тихоновӑна тата «Хӗвел» воспитательне Светлана Ивановӑна ЧР Вӗренӳ министерствин Хисеп грамотипе чысланӑ. Акатуйра ыттисене те пысӑк ҫитӗнӳсем тунӑшӑн хавхалантарнӑ.

Кун хыҫҫӑн концерт пуҫланнӑ. Сцена ҫине пултарулӑх ушкӑнӗсем тата чӑваш эстрадин артисчӗсем тухнӑ. Хӑнасем алӗҫ ӑстисен пултарулӑхне пӑхса киленнӗ, наци апат-ҫимӗҫне, килти сӑрана тутаннӑ.

Сӑнсем (70)

#Элӗк районӗ, #Акатуй, #уявсем, #Элӗк, #Тавӑт, #концертсем