Хӗрлӗ Чутайри кӗнеке куравӗ

Ыран паллӑ прозаик, публицист, тӑлмач, чӑваш халӑх ҫыравҫи Хветӗр Уяр (Федор Ермилович Уяр) ҫуралнӑранпа 100 ҫул ҫитет. Вӑл 1914 ҫулхи ака уйӑхӗн 14-мӗшӗнче Самар облаҫӗнчи Схури-Матак ялӗнче ҫуралнӑ.

Хветӗр Уяр Самарти чӑваш шкулӗнче, Хабаровскри педагогика техникумӗнче, Благовещенскри тата Чаваш Республикинчи педагогика институчӗсенче вӗреннӗ. Унтан вӑл Инҫет Хӗвелтухӑҫӗнчи пуҫламӑш шкулта ачасене вӗрентнӗ. Каярахпа Чӑваш Республикинчи Красноармейски, Ҫӗрпӳ районӗсенчи шкулсенче вӑй хунӑ, Чӑваш радиокомитетӗнче литература ӗҫченӗ пулнӑ. Хветер Уяр ЧАССР Кӗнеке палатинче, «Капкӑн» журнал редакцинче те ӗҫленӗ.

Вӑл Тӑван ҫӗршывӑн Аслӑ вӑрҫинче пулнӑ, ӑна Тӑван ҫӗршыв вӑрҫин I степень орденӗпе, III степень Мухтав орденӗпе, медальсемпе чысланӑ. Федор Ермилович чӑваш литературине пӗчӗк жанрпа кӗнӗ (калавсем, очерксем, фельетонсем…). Пӗрремӗш хайлавӗ 1930 ҫулта пичетленнӗ.

Пӗлтерӗшлӗ кӗнекисенчен пӗри — «Таната» историллӗ романӗ. Ӑна Чӑваш Ен литературовечӗсем кӑна мар, Мускаврисем те, ют ҫӗршыврисем те пысӑк хак панӑ.

Хветӗр Уяр вырӑссен илемлӗ литературине чӑвашла куҫарнӑ. Вӑл А.Чехов, М.Горький, Н.Гарин-Михайловский, Н.Телешов, С.Диковский тата ыттисен хайлавӗсене чӑвашлатнӑ.

Хӗрлӗ Чутай районӗнчи тӗп вулавӑшра Хветӗр Уяр ҫуралнӑранпа 100 ҫул ҫитнине халалласа «Уяр ҫӗршывӗнче» кӗнеке куравӗ йӗркеленӗ. Кунта прозаикӑн биографийӗпе, унӑн кӗнекисем, ҫыравҫӑ пирки хатӗрленӗ критика статйисемпе паллашма пулать.

#Хӗрлӗ Чутай районӗ, #куравсем, #кӗнекесем, #юбилейсем, #Самар облаҫӗ, #Красноармейски районӗ, #Ҫӗрпӳ районӗ