Чӗлхе, поэзи тата ӳнер тӗпчевҫи, Чӑваш патшалӑх гуманитари ӑслӑлӑхӗсен институчӗн чӗлхе пӗлӗвӗ пайӗн пуҫлӑхӗ, Чӑваш наци конгресӗн хисеплӗ президенчӗ, филологи наукисен кандидачӗ Атнер Хусанкай 60 ҫул тултарчӗ. Чӑваш патшалӑх гуманитари ӑслӑлӑхӗсен институчӗн ларусен залӗнче ҫав ятпа савӑнӑҫлӑ пуху иртрӗ. Хисеплӗ кӗрекере юбиляр хӑй, унӑн амӑшӗ – СССР халӑх артистки Вера Кузьмина, институт директорӗ Валерий Григорьев профессор, Чӑваш Республикин культура министрӗ Роза Лизакова, ЧР вӗренӳ министрӗ Галина Чернова пулчӗҫ. Атнер Петровича Республика президенчӗ Николай Федоров, Патшалӑх Канашӗн пуҫлӑхӗ Михаил Михайловский тата ытти сумлӑ ҫынсем ятарлӑ телеграммӑсемпе саламланӑ. Раҫҫейри тата ют патшалӑхри паллӑ ӑсчахсем янӑ саламсене те вуласа пачӗҫ. Министрсем Атнер Хусанкая Хисеп грамотипе тата хаклӑ парнепе чысларӗҫ. Шкул тата лицей ачисем ун ячӗпе юрӑ-сӑвӑ шӑрантарчӗҫ.

Паллӑ ӗнтӗ, Атнер Петрович хӑй ҫавра ҫулсене паллӑ тума кӑмӑлламасть. 50 ҫулӗ тӗлӗнче чылайлӑха Мускава тухса кайнӑччӗ, 60 ҫуллӑх вӑхӑтӗнче те вӑл Тибета е Исландие “тарасшӑнччӗ” – сыватӑша сипленме ҫӳренӗрен ҫеҫ юбилей уявӗнчен хӑтӑлса юлаймарӗ. Хусанкай пултарулӑхӗ тӗрлӗ енлӗ, ҫавӑнпа ӑна саламлама такам та килнӗ% чӗлхепе сӑмахлӑх тӗпчевҫисем, ҫыравҫӑсемпе ӳнерҫӗсем, вӗрентекенсемпе хаҫатҫӑсем... Ҫулсем иртӗҫ те, паянхи ҫамрӑксем килес ӑрусене мухтанса каласа парӗҫ% “Эпир Атнер Хусанкая курнӑ, унпа хутшӑннӑ!”

Хусанкай кил-йышӗсӗр пирӗн наци культурин пӳлми чылай чухӑнрах пулӗччӗ. Ҫак уйӑхӑн 16-мӗш кунӗнче Петӗр Хусанкайӑн мӑшӑрӗ, Атнер Хусанкайӑн амӑшӗ, Чӑваш театрӗн мухтавлӑ ӑсти Вера Кузьмина 85 ҫул тултарать. Чӳк уйӑхӗн 18-мӗшӗнче ҫав ятпа академи театрӗнче “Хура чӗкеҫ” моноспектакль пулать. Эсир ҫак ҫутӑ тӗнчен кирек хӑш кӗтесӗнче пулсан та хӑвӑрӑн ҫепӗҫ те ырӑ чӗрӗрте упранакан ӑшӑ туйӑмӑрсене Ӑста патне ҫитерме кая юлман-ха. Поэт калашле — ыр сӑмах калама ан ӳркенӗр!

#Чӑваш патшалӑх гуманитари ӑслӑлӑхӗсен институчӗ, #театрсем, #юбилейсем, #ЧНК