Праски Виттин эскизӗ

Чӑваш патшалӑх гуманитари ӑслӑлӑхӗсен институтӗнче ӗнер, акан 7-мӗшӗнче, «Пӗтӗм чӑваш диктанчӗ» тавра ҫыхӑнну ыйтусене сӳтсе явма тепӗр хут пуҫтарӑннӑ.

Калаҫӑва кӗскен пӗтӗмлетсен ҫак хыпарсене пӗлтерме пулать. Наци радиовӗ валли текста вуланӑ та иккен, ку ӗҫе РСФСР тата Чӑваш АССРӗн халӑх артистки Нина Яковлева пурнӑҫланӑ. Ҫавӑн пекех тепӗр шухӑш — республика тулашӗнчи чӑвашсем валли ятарлӑ видео хатӗрлесси. Ӑна YouTube видеохостингра е тепӗр вырӑнта лартасшӑн (видео диктант пуҫлансан курӑмланӗ). Ларура мероприятин логотипне — элемне — хатӗрлес ыйтӑва та хускатнӑ. Кунта Праски Витти ӑсталанӑ ӗҫе суйласа илнӗ.

Аса илтеретпӗр, «Пӗтӗм чӑваш диктанчӗ» эрнекун, акан 25-мӗшӗнче, 13 сехетре иртмелле. Ҫырас шухӑшлисем Чӑваш Рсепубликин вӗренӳ институтне е И.Я. Яковлев ячӗллӗ Чӑваш патшалӑх педагогика институтне пымалла. Ҫавӑн пекех килте те ҫырма пулать — Марина Карягина ҫырнӑ текста Наци радиовӗн эфирӗнче вуласа парӗҫ. Ҫыру йӗркине аса илес кӑмӑл пур пулсан сире акан 21-мӗшӗнче (тунтикун) вӗренӳ институтӗнче 13 сехете кӗтеҫҫӗ — унта тӳлевсӗр вӗрентӳ иртӗ. «Пӗтӗм чӑваш диктантне» хутшӑнас кӑмӑл пур пулсан total.dictant.2014@yandex.ru адреспа заявка ямалла. Ун хурмине ЧПГӐИ сайтӗнче илме пулӗ.

#Чӑваш чӗлхи кунӗ, #Пӗтӗм чӑваш диктанчӗ, #чӑваш чӗлхи, #ЧПГӐИ, #ЧППУ, #наци радиовӗ