Ксения Столбовӑпа Федор Климов

Нумаях пулмасть «Pro Город» порталӗ пӑр ҫинче илемлӗ ярӑнас енӗпе Олимп чемпионкин Ксения Столбовӑн инкӗшӗ Шупашкарта пурӑннине пӗлнӗ. Хаҫат журналисчӗсем Зоя Кирилловӑпа ҫыхӑннӑ, спортсменкӑн ачалахӗ пирки ыйтса пӗлнӗ.

Хӗрарӑм каланӑ тӑрӑх, унӑн тӑван пиччӗшӗ Зиновий Васильевич Васильев — Ксения Столбовӑн аслашшӗ. Зиновийпе Зоя Етӗрне районӗнчи Анатри Ачак ялӗнче ҫуралнӑ. Ҫемьере вӗсемсӗр пуҫне тепӗр тӑватӑ ача ӳснӗ.

— Пиччене хӑй вӑхӑтӗнче Санкт-Петербурга ҫар службине янӑ. Ҫар-тинӗс флотӗнче вӑл 4,5 ҫул пулнӑ. Кун хыҫҫӑн Зиновий Чӑваш Ене таврӑнман. Унтах хӑйӗн пулас мӑшӑрӗпе паллашнӑ. Пиччепе тачӑ ҫыхӑну тытатпӑр, телефонпа час-часах калаҫатпӑр, — каласа кӑтартнӑ Зоя Кириллова. Ксения 2-мӗш класра вереннӗ чухне хӗрарӑм вӗсем патӗнче Питӗрте хӑнара пулнӑ. Зоя Кириллова каланӑ тӑрӑх, Ксюша ун чухнех вӑр-вар пулнӑ, ҫынсемпе калаҫма юратнӑ. Хӗрача яланах тӗллевӗ патне талпӑннӑ. Зиновий мӑнукӗпе мухтанать, ӑна юратать, вӗсен ҫемйине яланах пулӑшать. Зоя Кириллова Олимп вӑййине телекуравпа тимлӗн пӑхнӑ.

Ксения Столбова малтан пӑр ҫинче пӗччен ярӑннӑ, каярахпа мӑшӑрпа ярӑнма тытӑннӑ. Ксения Столбовӑпа Федор Климов пӑр ҫине тухсан Зоя Кириллова хӑйӗнпе мӗн пулнине хӑй те ӑнланман.

— Вӗсем пӑр ҫинче лайӑх ярӑнсан савӑннипе макӑртӑм. Мана тӑвансем, пӗлӗшсем шӑнкӑравларӗҫ. Пичче ҫав вӑхӑтра мӑнукӗшӗн куляннӑран юн пусӑмӗ хӑпарнине каларӗ. Сочие Ксенийӑпа пӗрле амӑшӗ кайнӑ, уншӑн пӑшӑрханнӑ. Амӑшӗ ҫамрӑк чухне гимнастикӑпа кӑсӑкланнӑ, аслашшӗ те спортсмен пулнӑ-мӗн. Эппин, Ксения Столбовӑн ку юнра.

Зоя Кириллова пӗлтернӗ тӑрӑх, Ксения тӑван тӑрӑхӗнче пӗр кун ҫеҫ пулнӑ, унтан Японие кайнӑ. Хӗрарӑмӑн хӗрӗ Оксана Ксенийӑпа уйрӑмах ҫыхӑну тытать. Спортсменка пирӗн республикӑран аякра пулсан та ӑна Чӑвашри тӑванӗсем яланах хавхалантараҫҫӗ, юратаҫҫӗ.

#олимп вӑййисем, #ҫитӗнӳсем, #Етӗрне районӗ, #Анатри Ачак