Чӑваш наци телерадиокомпани хальлӗхе ертӳҫӗсӗр пурӑнать, пуҫлӑх тивӗҫӗсене Стройкова Юлия Викторовна туса пырать. Чӳк уйӑхӗнче пуҫлӑха суйлассине тепӗр хут ирттерес тӗлӗшпе ӗҫе пуҫӑннӑ — конкурс пуҫарнӑ. Хутсене раштавӑн 7-мӗшӗччен йышӑннӑ. Сас-хура пӗлтернӗ тӑрӑх ҫӗнӗ конкурса хӑйсене кирлӗ ҫынна тупма пултарнӑран йӗркеленӗ имӗш.

Информаци политикипе масӑллӑ коммуникаци министерствине хӑйсен хучӗсене темиҫе ҫын тӑратнӑ теҫҫӗ. Енчен те малтанхи конкурса ытларах арҫынсем хутшӑннӑ пулсан, хальхинче хӗрарӑмсем нумайрах. Сас-хура пӗлтернӗ тӑрӑх кандидатсем хушшинче Юлия Стройкова (хальхи вӑхӑтра пуҫлӑх тивӗҫӗсене тӑвакан), Марина Карягина (чӑваш поэчӗ, телекуравра нумай ҫул тӑрӑшакан), Александр Магарин (хӑй вӑхӑтӗнче «Чӑваш Ен» телекомпанин ертӳҫин ҫумӗ пулнӑ), Татьяна Ильина («Ҫапла пултӑр» передача ертӳҫи, ЧНК ӗҫтӑвком ертӳҫи) пур. Марина Карягинӑпа ҫыхӑнса калаҫнӑ хыҫҫӑн конкурса хутшӑнма хутсене вӑл кайса пани пирки пӗлтерчӗ, раштавӑн 7-мӗшӗнче кайнӑ иккен. Татьяна Ильина та кандидатсем хушшинче пуррине хирӗҫлемерӗ.

Конкурс комиссийӗ пуҫлӑх ыйтӑвне раштавӑн 24-мӗшӗнче татса парӗ. Чи нумай сас пухаканни ҫӗнтермелле. Пӗрешкел сас пухсан вӗсен хушшинче кам пулмаллине конкурс комиссийӗнчисем уҫӑ сасӑлав ирттерсе палӑртӗҫ имӗш. Ҫапларах сасӑлав йӗркине министрество сайтӗнче пӗлтернӗ.

Мӗнех, вӑхӑт нумаях юлмарӗ, черетлӗ конкурс пӗтӗмлетӗвӗпе пире ҫывӑх вахӑтра паллаштарӗҫех пуль. Мускав ҫыннине лартас шухӑшлӑ текен сас-хура тӳрре тухнипе тухманнине те курӑпӑр вара.

Асаилтеретпӗр, унччен пуҫлӑхра Маргарита Гартфельдер ларса, ӑна кӑҫал ҫу уйӑхӗнче ӗҫрен кӑларса ячӗҫ (контрактне тӑсмарӗҫ). Утӑ уйӑхӗнче ҫӗнӗ ҫын килмеллеччӗ те, конкурса тӑратнӑ ҫынсенчен комиссие нихӑшӗ те килӗшмен. Вӑхӑтлӑха пуҫлӑх ӗҫне туса пыракан Стройкова Юлиях юлчӗ темелле.

#наци телерадиокомпанийӗ, #телекурав, #Ҫапла пултӑр, #ЧНК, #суйлавсем