Марина Карягина архивӗнчи сӑнӳкерчӗксемпе усӑ курса хатӗрленӗ коллаж

Хусанта «Лиффт» пӗтӗм Раҫҫейри VII литература фестивалӗнчен пирӗн ентешӗмӗр Марина Карягина Ылтӑн лауреат ятпа таврӑннӑ. Унтан та ытларах — ҫав сумлӑ фестиваль ҫитес ҫул пирӗн республикӑра иртӗ.

Фестиваль вӑхӑтӗнче, сӑмах май каласан, Мускаври Александр Куприн режиссёрӑн «Амфистроф. Встречное течение» фильмне те хавхаланса сӳтсе явнӑ. Аса илтерер: фильмра хальхи вӑхӑтри паллӑ та пултаруллӑ чӑваш поэчӗн Марина Карягинӑн пултарулӑхӗ ҫинчен каласа кӑтартнӑ.

Раҫҫейри писательсен тата Раҫҫейри кинематографистсен союзӗсен членӗ пирки поэзи анинчи ҫӗнӗ ҫӗре ватакан тесен те йӑнӑш мар-тӑр. Мӗншӗн тесен Марина Карягина ку сӑмаха чӑннипех те тивӗҫ. Вӑл — халиччен тӗнче поэзийӗнче пулман амфистроф ӑсти. Специалистсем каланӑ тӑрӑх, ку сӑмах хальлӗхе словарьте те ҫук-ха. Карягина амфистрофӗсем сулахайран сылтӑмалла, сылтӑмран сулахаялла тарӑн шухӑшпа вуланаҫҫӗ. Палиндромра (Марина Карягина ку жанрпа та ҫырать) йӗркесем малтан та, хыҫалтан та пӗр пек вуланаҫҫӗ пулсан, амфистрофра шухӑш пӗлтерӗшӗ улшӑнать, пӗр текстрах икӗ хайлав пулса тухать. «Амфистроф — чӑннипех тӗлӗнтерекен жанр. Тӗнче поэзийӗнче кун пек ҫыракан хальччен пулман», — терӗ фестиваль йӗркелӳҫи Маргарита Аль, Евразири халӑхсен Ассамблейинчи литература канашӗн ертӳҫи, Пӗтӗм тӗнчери писательсен «WOW» организацийӗн президенчӗ.

Фестивале хутшӑнакансене ЮНЕСКОн Ырӑ кӑмӑл элчи Александра Очирова тата Еврази халӑхӗсен ассамблейин правительствӑсем мар организацисен пӗтӗм тӗнчери союзӗн генеральнӑй секретариачӗн ертӳҫи Светлана Смирнова та саламланӑ.

Фильм хӑтлавне хутшӑннисем Марина Карягина пултарулӑхне пӗр шухӑшлӑн ырласа йышӑннӑ май унӑн ӑсталӑхӗнчен татти-сыпписӗр тӗлӗннине чунтан палӑртнӑ. «Марина Карягинӑна эпӗ пуҫласа Шупашкарта, «ГолосА» фестивальте итленӗччӗ. Вӑл пысӑк, асамлӑ, тӗлӗнмелле поэт!», — хавхаланса та ҫунатланса палӑртнӑ Хусанти Айрат Бик-Булатов поэт.

«Лиффт» фестиваль йӗрки тӑрӑх, унӑн ялавне ылтӑн лауреата параҫҫӗ. Ӑна Марина Карягинӑна «тӗнче поэзийӗнче ҫӗнӗ жанр уҫнӑшӑн» панӑ. Палӑртар: хальччен ку фестивале Мускав, Крым, Сочи, Тюмень, Ӗпхӳ, Баку, Турци, Египет ҫыравҫисем ылтӑн лауреат пулса тӑнӑран литература мероприятийӗ ҫав регионсемпе ҫӗршывсенче пуҫтарӑннӑ. Килес ҫул Чӑваш Енре тата Африкӑри Ганӑра иртмелле.

#Кени, #Сочи, #фильмсем, #Хусан, #Турци, #пултарулӑх, #поэтсем, #Мускав, #Крым, #фестивальсем, #Баку, #Египет, #Африка, #Ӗпхӳ, #Тӗмен