esudroff ӳкернӗ сӑн, Pixabay сайтран илнӗ

Сарӑту облаҫӗнчи ЗАГС ӗҫӗн управлени пуҫлӑхӗ Юлия Пономарева пӗлтернӗ тӑрӑх, вӗсен тӑрӑхри чи ҫамрӑк амӑшӗ 2021 ҫулта — 14 ҫулти хӗрача. 13 ҫулти Любӑпа ар ҫыхӑнӑвне кӗнӗшӗн 23 ҫулти курьера айӑпласа виҫӗ ҫуллӑха колонине ӑсатнӑ, анчах вырӑнти МИХсем пӗлтернӗ тӑрӑх, ачан ашшӗ вӑл мар пулса тӑнӑ.

«Вольск.ру» портал пӗлтернӗ тӑрӑх, рекордсменка Вольск хулинчи Люба иккен, вӑл 5-мӗш класра ҫие юлнӑ, ҫакӑ гинеколог патӗнче тӗрӗсленӗ чухне палӑрнӑ. Ака уйӑхӗн 16-мӗшӗнче пӗчӗк ачапа ар ҫыхӑнӑвне кӗнӗшӗн 23 ҫулти Сергей Заборовский курьера пӗтӗмӗшле режимлӑ колонине виҫӗ ҫула яма приговор йышӑннӑ. Суд ӑна УК РФӑн 134 статьян 3-мӗш пайӗпе (14 ҫула ҫитмен ачапа арлӑ ҫыхӑнӑва кӗни) айӑплӑ тесе йышӑннӑ.

Сергей Любӑна икӗ ҫул ытла пӗлнӗ. Унӑн малтанхи арӑмӗ каласа панӑ тӑрӑх, вӑл вӗсен туйӗ вӗҫленсенех темиҫе сехетлӗхе хӗр ача патне кайса килнӗ. Анчах ачан ашшӗ Сергей мар пулса тӑнӑ.

Пиллӗкмӗш класра вӗренекен хӗрачапа курьер пӗр-пӗринпе хирӗҫсе кайнӑ хыҫҫӑн вӑл укҫа ӗҫлесе илме Саратова тухса кайнӑ. Шкулта вӗренекен хӗрача вара 17-ри Александрпа ар ҫыхӑнӑвне кӗнӗ.

Портал пӗлтернӗ тӑрӑх, Люба август уйӑхӗн вӗҫӗнче ача ҫуратнӑ, анчах хӑй ҫула ҫитменнине пула пепкене кукамӑшӗ пӑхса ҫитӗнтерен. Сӑмах май каласан, Люба амӑшӗ 35 ҫулта кӑна-ха. Ҫамрӑк амӑшне хӑйне хальхи вӑхӑтра 6-мӗш класа куҫарнӑ, вӑл килти майпа вӗренет.

Заборовски Вольск район сучӗн йышӑнӑвне хирӗҫлемен, колоние кайнӑ. Улттӑмӗш клас хӗрачи ирӗклӗхсӗр вырӑна лекнӗ арҫынпа ҫыхӑну тытнипе тытманни паллӑ мар. Приговор йышӑниччен вӗсем мӑшӑрланасшӑн пулнӑ, «ТикТокра» пӗрле роликсем те ҫыра-ҫыра илнӗ, пӗр-пӗрне юратни ҫинчен каланӑ. Шкул хӗрачи халӑх тетелӗсенче Сергей хушамачӗпе те алӑ пусма пуҫланӑ пулнӑ.

#Вольск, #статистика, #Сарӑту облаҫӗ, #кӳршӗре, #ачасем