«Шинель пике» спектакльти сыпӑк

Ҫӗртмен 5-мӗшӗнче Константин Иванов ячӗллӗ Чӑваш патшалӑх драма театрӗ Тӗрӗк халӑхӗсен пӗтӗм тӗнчери «Науруз» театр фестивальне хутшӑнӗ. Вӑл кӑҫал 11-мӗш хут иртет. Фестивале Хусан хулинче йӗркелӗҫ.

К. Тинчурин ячӗллӗ Тутар патшалӑх драмӑпа камит театрӗн сцени ҫинче Чӑваш Енӗн артисчӗсем Николай Коляда пьесипе лартнӑ «Шинель пике» спектакле кӑтартӗҫ. Ӑна Наталия Сергеева лартнӑ (сӑмах май, вӑл хӑй те театр артисчӗ). Сценарине Валерий Яковлев тӗп режиссёр ҫырнӑ. Тумӗсене Галина Герасимова художник шухӑшласа кӑларнӑ.

ЧР Культура министерстви Чӑваш патшалӑх драма театрӗ кун пек пек фестивале пӗрре кӑна мар хутшӑнса ҫӗнтерӳҫӗ пулса тӑни пирки аса илтерет. 1998 ҫулта Николай Сидоров пьесипе лартнӑ «Хӳхӗм хӗрӗн хӳхлевӗ» спектакле «культурӑллӑ лартнӑшӑн» Валерий Яковлев режиссёр диплома тивӗҫнӗ. Тепӗр тӑватӑ ҫултан Чӑваш Енӗн тава тивӗҫлӗ артистки Светлана Андреева «Иккӗмӗш планри чи лайӑх хӗрарӑм ролӗ» номинацире, Раҫҫей тава тивӗҫлӗ, Чӑваш халӑх артисчӗ Геннадий Большаков вара актёр ӑнӑҫлӑхӗшӗн парнеллӗ пулса тӑнӑ. Ун чух чӑвашсем Арсений Тарасов пьесипе «Инҫет телей ҫути» спектакле кӑтартнӑ. 2005 ҫулта Валерий Яковлев тӗп режиссер «Режиссёрӑн чи лайӑх ӗҫӗ» номинацире, СССР халӑх артистки Вера Кузьмина «Чи лайӑх хӗрарӑм ролӗ», Елизавета Хрисанова вара «Иккӗмӗш планри чи лайӑх хӗрарӑм ролӗ» номинацире палӑрнӑ. Ку чыса вӗсем Федерико Гарсия Лорка пьесипе лартнӑ «Арҫынсӑр хӗрарӑм» спектакле кӑтартса тивӗҫнӗ.

#театрсем, #Чӑваш патшалӑх академи драма театрӗ, #фестивальсем, #Хусан