Чӑваш кӗнеке издательствинче ҫӗнӗ ҫул тӗлне 16 вӗренӳ кӗнеки хушма тиражпа пичетленнӗ. Пӗлтӗр Чӑваш Республикин Вӗренӳ институчӗ вӗрентӳ учрежденийӗсенче тӑван чӗлхе, литература тата культурипе историне вӗрентме вӗренӳ кӑларӑмӗсем ҫителӗклине тишкернӗ. Унта республикӑри 328 вӗренӳ учрежденийӗ хутшӑннӑ. Ҫак тишкерӳ кӗнекесем ҫитменнине кӑтартса пачӗ. Вӗренӳ кӗнекисен ҫӳлӗкӗ 800-тен пуҫласа 6600 экземпляр таран пуянланнӑ.

Тӑван (чӑваш) чӗлхипе тӗп пӗлӳ паракан вӗренӳ организацийӗсем валли А.А. Ермошкинӑпа Н.Н. Черновӑн 1-мӗш класс валли «Чӑваш азбуки», 5-мӗш классем валли Л.П. Сергеевӑн, Е.А. Андреевӑн, Г.Ф. Брусовӑн, ҫиччӗмӗшсем валли Ю.М. Виноградовӑпа Л.Г. Петровӑн «Чӑваш чӗлхи» вӗренӳ кӗнекисем кун ҫути курнӑ.

«Тӑван литература» кӑларӑм та тепӗр хут пичетленнӗ. 5-мӗш, 6-мӗш классем валли (авторӗ тата хатӗрлекенӗ ‒ Н.Г. Иванова), ҫиччӗмӗшсем валли (авторӗсем тата пухса хатӗрлекенӗсем ‒ Н.И. Степановӑпа П.Н. Метин) «пиҫсе тухнӑ».

Чӑваш кӗнеке издательствинче пӗлтернӗ тӑрӑх, вырӑсла вӗрентекен чылай шкулта Г.В. Абрамовӑн «Чӑваш чӗлхи» вӗренӳ кӗнекипе усӑ кураҫҫӗ, ӑна автор ансат чӗлхепе ҫырнӑ, уроксене темӑсем тӑрӑх пайланӑ. Галина Васильевна ҫак линипе пӗрремӗш класран пуҫласа тӑххӑрмӗшсем валли таранах вӗренӳ кӗнекисем хатӗрлесе кӑларнӑ. Апла пулин те 1‒4-мӗш классем валли кӗнекесем ҫителӗклех мар иккен, ҫавӑнпа та хальхинче вӗсене те пичетленӗ.

О.И. Печников, М.Н. Печникова, Н.А. Краснова тата Е.А. Мулюкова 8-мӗш класс валли хатӗрленӗ «Чӑваш чӗлхи» кӑларӑма та тепӗр хут кӑларнӑ.

Юлашки ҫулсенче Е.В. Енькка 1-4-мӗш классем валли «Тӑван ен» (Родной край) вӗренӳ пособийӗсем хатӗрлерӗ. Вӗсенче «метапредмет» текен ӑнлав тӗпре тӑрать. Урӑхла каласан, тӑван ен культурине лайӑх ӑнланас тесен ытти предмета, сӑмахран, историе, математикӑна, тӑван чӗлхене тата литературине, пӗлмелле. «Тӑван ен» 1-3-мӗш классем валли ҫителӗксӗррине кура ӑна хушса пичетлемелли кӑларӑмсен списокне кӗртнӗ.

#Вӗренӳ институчӗ, #вӗренӳ, #кӗнекесем, #чӑваш чӗлхи