Чӑвашстат ҫурчӗ

Чӑвашстат пӗлтернӗ тӑрӑх республикӑри ҫынсен кӑҫалхи кӑрлачпа авӑн уйӑхӗсенчи вӑтам ӗҫ укҫи 16 503,90 тенкӗпе танлашнӑ. Атӑлҫи федераллӑ округри тӑрӑхсемпе танлаштарас пулсан ҫак кӑтарту Мӑкшӑпа (13 816,70) Мари Эл (15 405, 10) республикӑрисенчен тата Киров облаҫринчен (16 078,90) пысӑкрах. Чи пысӑк вӑтам ӗҫ укҫи вара — Тутарстанра, вӑл 22 295,80 тенкӗпе танлашать.

Ыттисенчен ытларах республикӑра укҫа-тенкӗ тӗлӗшӗнче (23 916 тенкӗ) ӗҫлекенсем, ҫурт-йӗр тӑвакансем (19 914) пулнине кӑтартать Чӑвашстат. Пӗлтӗрхи ҫак тапхӑрпа танлаштарсан ӗҫ укҫи пӗтӗмӗшле 12,4% ӳснӗ. Ҫак кӑтарту Перӗм енӗпе Чулхула облаҫӗнче сахал пулнине пӗлтернӗ — 7,4% тата 7,5% кӑна. Пенза облеҫӗпе Тутарстанра вара — самай ӳснӗ: 13,9 тата 13,2%.

Вӑхӑтра тӳлемен ӗҫ укҫи калӑпӑшӗ паянхи куна 62 245 пин тенкӗпе танлашать иккен, кӑрлач уйӑхӗпе пӑхсан 21,4% чакнӑ.

Пӗлме: 1970 ҫулта Чӑваш Енри вӑтам ӗҫ укҫи 87 тенкӗпе танлашнӑ, вӑл вӑхӑтрах Мари Элте 96 тенкӗ, Мӑкшӑ Республикинче — 91 тенкӗ тӳленӗ. 1975 ҫулхи кӑтартусем: Чӑваш Енре — 113 тенкӗ, Мари Элпе Мӑкшӑ республикисенче — 124 тата 122 тенкӗ. 1985 ҫулта вӑтам ӗҫ укҫи 160 тенке ҫитнӗ, маларах асӑннӑ республикӑсенче — 168 тата 169 тенкӗне. 1990 ҫулта палӑртнӑ кӑтартусем: Чӑваш Енре — 237 тенкӗ, Мари Элте — 254 тенкӗ, Мӑкшӑ республикинче — 248 тенкӗ. Чи пӗчӗк укҫа илекенсем шутне ҫавӑн пекех Пенза облаҫӗ кӗнӗ — 251 тенкӗ. 1995 ҫулхи вӑтам ӗҫ укҫи пирӗн республикӑра 253 пинпе танлашнӑ, ҫав вӑхӑтра Чулхула облаҫӗнчисем 397 пин, Тутарстанрисем 428 пин илнӗ. Сахал илекенсем шутӗнче ҫавӑн пекех Мари Эл (254,4 пин), Пенза облаҫӗ (261 пин), Мӑкшӑ республики (276 пин) пулнӑ. 2000 ҫулта Чӑваш Енри вӑтам ӗҫ укҫи 1 196 тенкӗпе танлашнӑ. Ку вӑхӑталла Мари Элпе Мӑкшӑ республикисем пирӗнтен кая юлма пуҫланӑ — 1 164,8 тата 1 107, 6 тенкӗ. Пенза облаҫӗнчи вӑтам ӗҫ укҫи 1 258 тенке ҫитнӗ. 2003 ҫулта вӑтам ӗҫ укҫипе пирӗн республикӑна Мӑкшӑ республики иртсе кайнӑ — танлаштарма, 3 215 тата 3 251 тенкӗ. 2004 ҫулта Чӑваш ен вара, каллех, сахал ӗҫлесе илекенсен шутӗнче тӑваттӑмӗш вырӑна аннӑ (Мӑкшӑпа Пенза облаҫӗнчи ватам ӗҫ укҫи сахалтарах ӳснипе). 2007 ҫулта вӑтам ӗҫ укҫи пирӗн республикӑринчен Мӑкшӑ республикипе Мари Элте, ҫавӑн пекех Чӗмпӗр облаҫӗпе Пенза облаҫӗнче пӗчӗкрех пулнӑ. 2008 ҫултанпа Киров облаҫӗнчи лару-тӑру япӑхлана пуҫланӑ.

#Чӑваш Ен, #укҫа-тенкӗ, #экономика, #Мари Эл, #Мӑкшӑ республики, #кӳршӗсенче