Аслӑ Чурачӑк Яндекс карттинче

Ял ҫыннисемшӗн кашни магазин уҫӑлни хӑйне евӗр хаваслӑ уяв пулса тӑрать. Кафе хута кайни вара — тата та пысӑкрах пӗлтерӗшлӗ мероприяти. Ҫак кунсенче Комсомольски районӗнчи Аслӑ Чурачӑк ялӗнче савӑнӑҫлӑ лару-тӑрура «Встреча» кафен алӑкӗсем уҫӑлчӗҫ. Райпо тытӑмӗн ҫӗнӗ обществӑлла апатлану точкине хута янӑ ҫӗре Чӗчкен ял тӑрӑхӗнче пурӑнакансем йышлӑн пуҫтарӑнчӗҫ.

Пуҫтарӑннисене чи малтанах район пуҫлӑхӗ, райпо совечӗн председателӗ Евгений Карпеев саламларӗ. Ҫак кафе ҫывӑхра пурӑнакансемшӗн ҫеҫ мар, районшӑн та питӗ кирлӗ пулнине палӑртрӗ, строительсене ӗҫсене вӑхӑтра тата пахалӑхлӑ тунӑшӑн тав турӗ. Чӗчкен ял тӑрӑхӗн пуҫлӑхӗ Юрий Лукиянов кафе хӑнасене кӗтсе илме яланах хатӗрри питӗ меллӗ пулнине, вӑл ял ҫыннисен культура шайне ӳстерме пулӑшнине палӑртрӗ, ҫуралнӑ кунсене, юбилейсене, туйсене тата ытти уява кунта ирттерме сӗнчӗ. Ҫавӑн пекех райпо председателӗн ҫумӗ Людмила Сорокина, райпо совечӗн членӗ Василий Николаев ҫак кафене тӑвас ӗҫре вӑй хунисене чылай ӑшӑ сӑмах каларӗҫ, ҫакӑн евӗр учреждени таврара урӑх ҫуккине ҫирӗплетрӗҫ.

Райпо ӗҫченӗсем ахальтен мар шӑпах ҫак ялта обществӑлла апатланӑвӑн пунктне тума шут тытнӑ. Аслӑ Чурачӑк районти чи пысӑк ялсенчен пӗри шутланать, кунта 700 ытла ҫын пурӑнать. Эппин, кафе пушӑ лармасса, халӑха та, унта ӗҫлекенсене те усӑ кӳрессе шанма пулать. Ҫынсене аякка ҫӳремесӗрех хӑтлӑ пӳлӗмре тӗл пулса шӑкӑл-шӑкӑл калаҫса ларма, пӗр-пӗр уява пуҫтарӑнса ирттерме май туса пани пысӑк пӗлтерӗшлӗ. Ҫакӑ паянхи ял хуларан нумай кая юлманнине ҫирӗплетет, ялтан писсе хуланалла талпӑнакансен шутне чакарасса шанас килет.

«Встреча» кафери тӗп залра 60 ҫын вырнаҫма пултарать. Унсӑр пуҫне 15 вырӑнлӑх банкет залӗ пур. Ҫавӑн пекех сулхӑнра чейпе сӑйланма кӑмӑллакансемшӗн ҫуллахи веранда ӗҫлет.

Ҫак кун савӑнӑҫлӑ мероприятие пуҫтарӑннисен райпо тытӑмне кӗрекен предприятисем туса кӑларакан тӗрлӗ апат-ҫимӗҫе те тутанса пӑхма май пулчӗ. «Встреча» кафере ирттернӗ тӗл пулусен шучӗ ӳстӗр. Унӑн алӑкӗсем апатланас, ларса канас текенсемшӗн яланах уҫӑ пулччӑр», — пӗтӗмлетрӗҫ уява пынисем.

Палӑртмалла: суту-илӳ, обществӑлла апатлану енӗпе ӗҫлекен усламҫӑсен шучӗ кунсерен ӳссе пырать пулсан та, райпо тытӑмӗ вӗсенчен кая юлмасть. Магазинсем пӗрин хыҫҫӑн тепри ҫӗнелсе сӑн-сӑпатне улӑштараҫҫӗ, ҫӗнӗ суту-илӳ, апатлану вырӑнӗсем уҫӑлаҫҫӗ. Райпо ӗҫченӗсем малашне районти ытти ялсенче те ҫакӑн евӗр кафесем туса лартасса шанас килет.

#Аслӑ Чурачӑк, #Чӗчкен ял тӑрӑхӗ, #кафесем, #Комсомольски районӗ