Шупашкарти 60-мӗш шкула республикӑри хуласемпе ялсенчи шкулсенче вӗрентекенсем пуҫтарӑнчӗҫ. Вӗсен хушшинче кӳршӗ Мари Эл ҫыннисем те пур. Сӑлтавӗ — кунта паян Раҫҫей шайӗнче вунвиҫӗ хутчен иртнӗ «Человек в истории. Россия — ХХ век» конкурс пӗтӗмлетӗвне туни тата ҫитес ҫул унта хутшӑнакансен мӗн ҫине тимлӗх уйӑрас пирки пычӗ. Ҫакӑн ҫинче Раҫҫей Мемориалӗн Чӑваш Республикинчи уйрӑмӗн ертӳҫи Екатерина Яранцева тата ҫутӗҫ программисен кураторӗ Максим Дмитриев тӗплӗн каласа пачӗҫ.

60-мӗш шкулта чӑваш культурине сӑнласа паракан паха музей вырнаҫнӑ. Ӑна йӗркелесе пӑхса тӑракан Людмила Аркадьевна Федотова пуҫтарӑннисене тӗрлӗ экспонатсемпе паллаштарчӗ, музей ӗҫӗ-хӗлӗ ҫинчен каласа пачӗ.

Каярахпа семинара пухӑннисен умӗнче Раҫҫей Мемориалӗн Мари Республикинчи уйрӑмӗн ертӳҫи Николай Аракчеев тухса калаҫрӗ. Ӑна шкулти аслӑ классенче вӗренекенсем те хапӑлласах итлерӗҫ. Николай Александрович тӑрӑшнипе Йошкар-Ола хулинче ГУЛАГ историйӗн Мемориаллӑ халӑх музейӗ уҫнӑ, ӑна вӑл хӑйӗх ертсе пырать. Пуҫтарӑннӑ ҫынсене Н.Аракчеев музейра упранакан хӑшпӗр сӑнӳкерчӗксемпе тата экспонатсемпе паллаштарчӗ, хӑй туса пыракан ӗҫ ҫинчен каласа пачӗ.

Семинарта кӗнекесен тата электронлӑ дисксен куравӗпе те паллашма май пулчӗ. Кӑмӑл тӑвакансене ҫывӑх вӑхӑтра ҫак литературӑна ярса пама шантарчӗҫ ертӳҫӗсем. Пӗлмелли, вӗренмелли нумай пулчӗ ҫак кун. Нумайӑшӗн ҫывӑх вӑхӑтра иртекен вунтӑваттӑмӗш конкурса хутшӑнма та кӑмӑл пур. Ӗҫлес кӑмӑла ҫӗклеме малашне те ҫакӑн йышши семинарсемпе ӗҫлӗ канашлусем ирттерме, тата кирлӗ сӗнӳсемпе канашсем пама хӑйсемпе ҫыхӑну тытма шантарчӗҫ республика уйрӑмӗн ертӳҫисем.

#Шупашкар, #семинарсем, #60-мӗш шкул