Шупашкарти пӗр медицина клиника ертӳҫи ултавҫӑсен аллине ҫакланса укҫа-тенкӗсӗр тӑрса юлнӑ.

Пӗр кунхине клиникӑна «прокуратура ӗҫченӗ» шӑнкӑравланӑ, хайхискер ҫитменлӗхсене тупса палӑртнине пӗлтернӗ, ку «ыйтӑва» татса пама май пурри пирки каланӑ.

Клиникӑн хӑраса ӳкнӗ администраторӗ номере пуҫлӑхне панӑ. Лешӗ те сехӗрленсе ӳкнӗ, «хӑратнӑ прокурор» чӑнах та тӗрӗслеме ан килтӗр тесе унӑн счечӗ ҫине темиҫе хутчен те укҫа куҫарнӑ.

Ҫапла майпа клиникӑн 58 ҫулти ертӳҫи ултавҫа 36 пин тенкӗ куҫарса панӑ. ЧР ШӖМӗ пӗлтернӗ тӑрӑх, ултавҫӑ шӑнкӑравланӑ номере Краснодар крайӗнче регистрациленӗ.

#Шупашкар, #ултавҫӑсем, #укҫа-тенкӗ