Шупашкарта пурӑнакан арҫын икӗ кӗленче хӗрлӗ эрех вӑрланӑшӑн колоние лекнӗ. Йӗплӗ пралук леш енче вӑл 1 ҫул та 7 уйӑх ирттерӗ.

2018 ҫулхи чӳк уйӑхӗн 9-мӗшӗнче хайхи арҫын Трактор тӑвакансен проспектӗнче вырнаҫнӑ «Пятерочка» лавккана кӗнӗ те сентре ҫинчен икӗ кӗленче хӗрлӗ эрех йӑтса касса умӗнчен тухса кайнӑ. Сутуҫӑсем таваршӑн тӳлемелли пирки асӑрхаттарсан вӑл хӑнк та туман. Тӑкак 237 тенкӗпе танлашнӑ

Каярахпа арҫын эрех тӑкакне саплаштарнӑ, хӑйӗн айӑпне йышӑннӑ. Суд вӑл унччен те административлӑ майпа явап тытнине тата ӑна тепӗр преступленишӗн тӗрмене хупмасӑр айӑпланине шута илнӗ. Хальхинче арҫынна колоние ӑсатма йышӑннӑ.

#Шупашкар, #эрех, #лавккасем, #вӑрӑсем, #колонисем, #судсем