Ҫӗпӗр чӑвашӗсем Чӳклеме ирттерни чӑннипех те Красноярск крайӗн наципе культура пурнӑҫӗнче историе кӗрсе юлмалли пулӑм. Мӗншӗн тесен чӑвашсен уявне регион шайӗнче уявлани кунта хальччен пулман. Ҫапах та йӗркелекенсене ҫак мероприятие мӗнле ирттересси мар, палӑртнӑ кунра ҫанталӑк мӗнле пуласси ытларах хумхантарнӑ, ара, Ҫӗпӗр кӗркуннинчен темӗн те кӗтме пулать-ҫке. Йӗпе-сапа ҫанталӑк мероприятие пӑсать ҫеҫ мар, унта хутшӑнакансен, курма пыракансен кӑмӑлне те хуҫать. Телее, ҫанталӑк уяр пулчӗ.

Красноярскран Назарово хулине уява автобуспа каяс текенсем ирхине ирех Мир тӳремне пуҫтарӑнчӗҫ. Унта вӗсем йӑхташсемпе Вадим Антонов генералпа тата Чӑваш Енри Элӗк районӗнчи «Валинкке» фольклор ушкӑнӗпе тӗл пулчӗҫ.

Палӑртнӑ кун кӑнтӑрла пултарулӑх ушкӑнӗсен артисчӗсем хӑнасемпе, куракансемпе алла-аллӑн тытӑнса вӑйӑ картине тӑрса юрӑ пуҫларӗҫ. Назарово хулин пуҫлӑхӗ Сергей Сетов, Назарово районӗн администраци пуҫлӑхӗ Сергей Крашенинников, крайри Кӗпӗрнаттӑр Аппарачӗн, Правительствин, Законодательство Пухӑвӗн официаллӑ ҫыннисем чӑвашсене, курма килнисене крайри пӗрремӗш чӑваш уявӗпе саламларӗҫ.

Уява Красноярск крайӗн нацисен Гражданла ассамблейин обществӑлла палатин председателӗ, регионти Чӑваш наципе культура автономийӗн президенчӗ Геннадий Храмов уҫрӗ. Халӑха ҫав кун 18 чӑваш, 4 вырӑс, украин халӑх пултарулӑх ушкӑнӗсемпе казаксен ансамблӗ юрӑ-ташӑпа савӑнтарчӗ.

Нацисен апатне, кил-тӗрӗшне кӑтартрӗҫ, сувенирсем сутрӗҫ. Ачасене те манмарӗҫ, вӗсем валли вӑйӑ площадкисем хатӗрленӗччӗ, тӗрлӗ конкурссемпе ӑмӑртусем ирттерчӗҫ. Вӑтам шкулӑн вӗренекенӗсене (200 ача) тата курма килнӗ кашни ачана асӑнмалӑх парнесем пачӗҫ. Уява кашни ҫын тенӗ пекех хутшӑнма пултарчӗ, вӗсем валли «Чи тутлӑ, чи хитре апат», «Чи пысӑк кукӑль», «Чи пӗчӗк вӗт кукӑль», «Чи тараватлӑ кил-тӗрӗш», «Чи тутлӑ сӑра вӗретекен» тата ытти конкурссем хатӗрлерӗҫ. Ҫӗнтерӳҫӗсене спонсорсем лайӑх парнесемпе савӑнтарчӗҫ.

#уявсем, #Раҫҫейре, #Красноярск крайӗ, #Элӗк районӗ