Кӗнеке хуплашки

Трак Ен тӑрӑхӗнчи Чатукасси ялӗнче пурӑнакан ывӑнма пӗлмен тата тараватлӑ чӑваш хӗрарӑмӗ Антонина Герасимовна Львова 2009 ҫулта вулакансене хӑйӗн пӗрремӗш кӗнекине «Манӑҫми сӑнарсем» ятпа парнелерӗ. Кӑҫал вара унӑн иккӗмӗш пысӑк ӗҫӗ — «Сувар сӑмахӗ» кӗнеки 1 пин экземпляр тиражпа кун ҫути курчӗ.

Ку хутӗнче А.Г. Львова халӑха хӑйӗн 1975—1995 ҫулсенче ҫырнӑ сӑввисемпе юррисене тата пурнӑҫ пирки шухӑшланисене сӗнет.

Сӑмах май, ӗҫчен те пултаруллӑскер, кӑҫалхи майӑн 5-мӗшӗнче 82 ҫул тултарчӗ. Вӑл шкулсенче ҫамрӑк ӑрӑва чылай вӑхӑт чӑваш чӗлхипе литературине вӗрентнӗ, чи маттуррисене явӑҫтарса кружок та йӗркеленӗ. Ялсен, шкулсен историне тӗпченӗ, вырӑнти ҫынсен пурнӑҫӗпе тата ӗҫӗ-хӗлӗпе интересленнӗ.

Ҫак кӗнекене кӗнӗ сӑвӑ-юрӑсем Тӑван ҫӗршывӑн Аслӑ вӑрҫи вӑхӑтӗнче фронтри паттӑрсемпе тылра вӑй хунӑ хӗрарӑмсен пурнӑҫӗпе таччӑн ҫыхӑннӑ, мӗншӗн тесен автор хӑй те ҫав тапхӑрти йывӑрлӑха ялта тӳсӗмлӗн чӑтса ирттернӗ. Ҫавӑнпах пуль Антонина Герасимовнан ыттисене каласа памалли темӗн чухлех.

Кӗнекене мӗншӗн «Сувар сӑмахӗ» ят панӑ-ха? А.Г. Львова ҫирӗплетнӗ тӑрӑх, суварсем историлле ята ялан сӑвапланӑ. Урӑх тӗне йышӑнман вӗсем — тӑван халӑх йӑли-йӗркине упраса хӑварма ҫине тӑнӑ. «Сувар» сӑмахӑн пӗлтерӗшӗ нумай. Халӑх ятне хисеплесе сӑввӑмсенче те «сувар» тесех шӑрҫаларӑм», — ҫырать умсӑмахра Антонина Герасимовна.

Кӗнекере сӑнӳкерчӗксем те пур. Вӗсенчен пӗринче Чӑваш Республикин Президенчӗ М.В. Игнатьев та сӑнланнӑ. Шупашкар районӗнчи «Прогресс» хуҫалӑх председателӗнче вӑй хунӑ чухне Михаил Васильевич Антонина Герасимовна шӑллӗне — Степан Герасимович Герасимова нумай сӗнӳ-канашпа пулӑшнӑ-мӗн.

Кӗнекене К. В. Иванов ячӗллӗ историпе культурологи тӗпчевӗсен фончӗ пичете сӗннӗ. Проект ертӳҫисем — истори ӑслӑлӑхӗсен докторӗ В.П. Иванов тата Ю.А. Львов таврапӗлӳҫӗ. Сумлӑ ҫак ӗҫшӗн Антонина Герасимовнана та, вӗсене те пысӑк тав.

#Чатукасси, #кӗнекесем, #Красноармейски районӗ