Ҫӗртмен 1-мӗшӗнче чӑваш филологийӗпе культура факультетӗнче куҫӑн уйрӑмри филологи специальноҫне алла илекен студентсем диплом ӗҫӗсене хӳтӗлерӗҫ. Вӗсен шутӗнче — театр ӑсталӑхӗпе халӑх ташшине вӗренекенсем, халӑх тата эстрада юррисене тӗпчекенсем.

Патшалӑх аттестаци комиссийӗн ертӳҫи И.Я. Яковлев ячӗллӗ ЧППУн профессорӗ Л.П. Сергеев пулчӗ. Хисеплӗ профессор студентсен ташӑ ӗҫӗсем тивӗҫлӗ шайра пулнине ӑслӑлӑх ӗҫӗсенче авалхи хӗрарӑмсен тата анат енчи, анатрипе вирьялсен ташшисене, паянхи сцена ҫинчи ташӑсене ӑнӑҫлӑ тишкернине палӑртрӗ. Уйрӑмах А.В. Игнатьевӑн „Хӗрарӑмсен авалхи пӗччен ташшин пуянлӑхӗпе ӳкерчӗкӗ”, Ж.Г. Ильинан „Аххаяс” авалхи чӑваш халӑх ташшин хайнееверлӗхӗ: ӗлӗкхи тата хальхи”, О.П. Сергеевӑн „Чӑваш ташшинчи ритуаллӑ хусканусен пӗлтерӗшпе тытӑмӗ” ӗҫӗсене ырӑпа асӑнчӗ. Студентсем хӑйсен ӗҫӗсене сцена ӑсталӑхне, балетмейстерпа режиссер ӗҫӗн хӑй евӗрлӗхне, уйрӑм артистсен пултарулӑхне, чӑваш ташшин тытӑмӗпе вӑрттӑнлӑхӗсене, тӗрлӗ тӑрӑхри юрӑ-кӗвӗ хӑй евӗрлӗхне тӗпчесе ҫырнӑ. Дипломҫӑсем фольклор материалӗсене тӗплӗн тишкерсе литература чӗлхипе ӑнлантарса ҫырса пама пултарни курӑнчӗ. Комисси членӗсем вӗсен ӗҫӗсем чӑваш наци культурипе искусство аталанӑвӗшӗн пӗлтерӗшлине палӑртрӗҫ.

Студентсен диплом ӗҫӗсене И.И. Иванов, В.А. Милютин, З.К. Яковлева, Р.Р. Андреева доцентсем ертсе пынӑ. Чӑваш филологийӗпе культура факультечӗ Чӑваш тӗнчи валли юрӑхлӑ аслӑ пӗлӳллӗ специалистсем хатӗрлес енӗпе тӑрӑшса ӗҫлерӗ.

Ӑнӑҫу Сире, пирӗн вӗренекенсем пулнӑ ӗҫтешӗмӗрсем!

#студентсем, #Чӑваш патшалӑх университечӗ, #Чӑваш филологийӗпе культура факультечӗ