Сайта кӗр | Регистраци | Сайта кӗрсен унпа туллин усӑ курма пулӗ
 +19.0 °C
Ҫӑла ан сур, шывне хӑвах ӗҫӗн.
[ваттисен сӑмахӗ]
 

Культура: Ҫутҫанталӑк лапамӗнче мар, ҫӳп-ҫап таврашӗнче канаҫҫӗ

Ӗҫ Интернет лавккана аталантарас енӗпе партнет шыратӑп. Паллашу Zoom урлӑ.
Паллашу Ырӑ кӑмӑллӑ илемлӗ ялти пурнӑҫа килӗштерекен хӗр-хӗрарӑмпа паллашса Ҫемье ҫавӑра...
Сутатӑп Тĕртнĕ(пусма) маска , 100 тенкĕпе сутатăп
Софья Савнеш 16.09.2016 20:40 | 3303 хут пӑхнӑ
Сумлӑ сӑмах Культура

Чӑннипе, ку вырӑн «ҫӑпан» пекех. Нумаях пулмасть иртнӗ акци пирки вуласан ҫак сӑмаха пуҫарас килчӗ. Авӑн уйӑхӗн 10-мӗшӗнче Трактор тӑвакансен культура керменӗ хыҫӗнчи ращана нимелле ҫӳр-ҫапран тасатнӑ. «Симӗс Раҫҫей» экологи общество юхӑмӗн хастарӗсем пӗчӗкех мар лаптӑка тирпей-илем кӗртнӗ. Мероприятие 150 ытла ҫын хутшӑннӑ. Ку — сахал мар. Шӑматкунлӑха министерствӑсемпе ведомствӑсен, предприятисемпе организацисен ӗҫченӗсем, студентсем тата ахаль ҫынсем хутшӑннӑ.

Культура керменне ҫынсем канма ҫӳреҫҫӗ. Унта таса та илемлӗ пулмалла. Кермен хыҫӗнче вара тасамарлӑх хуҫаланать. Унта ҫуркунне пулма тӳр килнӗччӗ. Эрне варри пулсан та халӑх йышлӑччӗ. Пурте илемлӗ ҫанталӑкпа киленме, шашлӑк пӗҫерме тухнӑ. Анчах хӑтсӑр та тирпейсӗр вырӑнта епле чунран канма пулать-ши? Йӗри-тавра пластик кӗленчесем, савӑтсем, хут йӑванать. Ҫынсем хӑш вырӑнта каннӑ — ҫӳп-ҫапа ҫавӑнтах ывӑтса хӑварнӑ. Тӳрреммӗн каласан, унта ҫутҫанталӑк лапамӗнче мар, свалкӑра каннӑн туйӑнать. Нивушлӗ кашни ҫынна хӑйӗн хыҫҫӑн пуҫтарма йывӑр? Йӑлтах пӗр хутаҫ пуҫтар та контейнера кайса пӑрах.

Контейнер тенӗрен, ку — уйрӑм ыйту. Унта темиҫе контейнер ларать. Анчах вӗсен таврашӗнче те тирпейсӗрлӗх хуҫланать. Эпӗ курнӑ чухне вӗсем ҫӳп-ҫаппа тулманччӗ, пушатнӑччӗ. Анчах ун тавра сапаланса выртакан ӑпӑр-тапӑра мӗншӗн пуҫтарманни маншӑн тӗлӗнмелле пулчӗ. Ӑна, паллах, пӗр-пӗр управляющи компанийӗ пӑхса тӑрать. Эппин, хӑйӗн тивӗҫне вӑл туллин мар, ҫиелтен пурнӑҫлать.

Хӑш-пӗр ҫынсем чӑнах та ҫапла латсӑр-ши — культура керменӗ хыҫӗнче волонтерсем тасатсан та кӑштах вӑхӑт иртсен унта ҫав ӳкерчӗкех хуҫаланать. «Пуҫтарнӑ ҫӗрте мар, ҫӳпӗлемен вырӑнта таса» тени чӑнах та чӑнлӑхпа пӗр килет. Нивушлӗ ҫак ҫивӗч ыйтӑва татса пама ҫук? Ҫынсем ним пулман пекех общество вырӑнӗнче эрех ӗҫеҫҫӗ, тавралӑха варалаҫҫӗ. Ачисем те ҫавӑнтах чупса ҫӳреҫҫӗ. Йӗрке хуралҫисем ҫакна курмӑш тӑваҫҫӗ-ши? Е ку вырӑнти тирпейсӗрлӗх пирки чӑнах та пӗлмеҫҫӗ-ши?

Шупашкарта кунашкал шӑматкунлӑхсем тата та ирттерме палӑртни савӑнтарать. Юпа уйӑхӗн 17-мӗшӗччен санкцилемен 70 ҫӳп-ҫап купине пӗтересшӗн. Аллейӑсенче, парксенче, пахчасенче, ҫул хӗрринче 3150 йывӑҫ-тӗм лартма палӑртнӑ. Пӗрисем тавралӑх илемӗшӗн тӑрӑшнӑ чухне теприсем ҫакна ним вырӑнне те хумасӑр хитре вырӑнсене сӑнсӑрлатаҫҫӗ, нӗрсӗрлетеҫҫӗ…

#шӑматкунлӑхсем, #Шупашкар, #ҫутҫанталӑк, #студентсем, #тирпейсӗрлӗх, #культура, #вӑрмансем, #парксем

 

Комментариле

Сирӗн ятӑp:
Анлӑлатса ҫырни:
B T U T Ячӗ1 Ячӗ2 Ячӗ3 # X2 X2 Ӳкерчӗк http://
WWW:
ӐӑӖӗҪҫӲӳ

Пурӗ кӗртнӗ: 0 симв. Чи пысӑк виҫе: 1200 симв.
Сирӗн чӑвашла ҫырма май паракан сарӑм (раскладка) ҫук пулсан ӑна КУНТАН илме пултаратӑр.

Эсир усӑ курма пултаракан Wiki тэгсем:

__...__ - сӑмаха каҫӑ евӗр тӑвасси.

__aaa|...__ - сӑмахӑн каҫине тепӗр сӑмахпа хатӗрлесси («...» вырӑнне «ааа» пулӗ).

__https://chuvash.org|...__ - сӑмах ҫине тулаш каҫӑ лартасси.

**...** - хулӑм шрифтпа палӑртасси.

~~...~~ - тайлӑк шрифтпа палӑртасси.

___...___ - аялтан чӗрнӗ йӗрпе палӑртасси.


Orphus

Баннерсем

Шутлавҫӑсем

 
Сайт пирки | Пулӑшу | Статистика
(c) 2005-2018 Chuvash.Org
Сайтри материалсене (ытти ҫӑлкуҫсенчен илнисемсӗр пуҫне) CreativeCommons Attribution-ShareAlike 3.0 лицензипе килӗшӳллӗн усӑ курма пулать. Сайтпа ҫыхӑннӑ ыйтусене кунта ярӑр: site(a)chuvash.org