Ачасен хӗллехи канӑвне усӑллӑ та хаваслӑ ирттерес тӗллевпе шкулсен ҫумӗнче кану лагерӗсем ӗҫлерӗҫ. Матакри вӑтам шкул (Ҫӗпрел районӗ) ҫумӗнчи «Хӗллехи халап» лагере тӗрлӗ класра вӗренекен ачасем кӑрлачӑн 3-мӗшӗнчен тытӑнса 9-мӗшӗччен ҫӳрерӗҫ.

Лагерӗн пысӑках мар коллективӗ (ертӳҫи Т.Барышова, воспитательсем Л.Шингарева (6-мӗш класс ертӳҫи), А.Шумилова (9-мӗш класс ертӳҫи), физкультура учителӗ А.Шингарев) кану программине питӗ интереслӗ йӗркеленӗ. Кашни куна тӗрлӗ темӑна халалланӑ: «Витаминия» ҫӗршывӗнче», «Хӗл Мучин мастерскойӗ», «Раштав елки» тата ытти те. Паллах, хӗллехи каникул-тӑк, лагерьти кану та шкулти классенче кӑна иртмест. Хальхинче те акӑ ачасем уҫӑ сывлӑшра нумай уҫӑлса ҫӳренӗ, вылянӑ, ҫывӑхри вӑрмана йӗлтӗрпе кайнӑ. Юртан чи хитре кӗлетке ӑсталассипе конкурс та пулнӑ.

Вӗҫен кайӑксем пирки те манман шкул ачисем, ара, ҫак пӗчӗк чунсене хӗллехи вӑхӑтра пӗрре те ҫӑмӑл мар-ҫке, апат тупма хӗн. Ҫакна шута илсе ачасем вӗсем валли пӗчӗк сырӑшсем ӑсталаса йывӑҫсем ҫине ҫакнӑ. Раштав уявӗ пирки те уйрӑммӑн каламалла. Ӑна паллӑ тумасӑр мӗнле ирттӗр-ха? Ачасем ку енӗпе сахал мар тӑрӑшнӑ, Раштав открыткисемпе кӑшӑлне хатӗрленӗ, тӗнчери тӗрлӗ халӑх ӑна мӗнле паллӑ тунипе паллашнӑ. Ҫӗн ҫул ҫинчен юрӑсемпе сӑвӑсем вӗреннӗ. Чи интересли – шкул умӗнче ӳсекен чӑрӑшсенчен пӗрне капӑрлатни, уяв кун юрӑсем юрласа ун йӗри-тавра ҫаврӑнни.

Урамра уҫӑ сывлӑшра выляса кӗрсен шкулта та вӑхӑт питӗ иртереслӗ иртнӗ ачасен. Вӗсене кунта хӗллехи викторинӑсем, сӗтел ҫи вӑййисем, интереслӗ мультфильмсем кӗтнӗ.

Яланхи пекех лагерь «Алло, эпир талантсем шыратпӑр!» концертпа тата «Хаваслӑ старт» вӑййипе вӗҫленнӗ. Пӗр сӑмахпа, хӗллехи канӑва ачасем тепӗр каникулччен аса илмелӗх те пур, унӑн кашни кунне сӑн ӳкерсе ҫирӗплетсе пынӑ-ҫке.

#Тутарстан, #Матак, #Ҫӗпрел районӗ, #каникул