Ҫӑмӑл атлетикӑсен пӗтӗм тӗнчери ассоциацийӗ Раҫҫей спортсменӗсене Рио-де-Жанейрӑра иртекен Олимп вӑййисене хутшӑнмашкӑн ирӗк паман. Кун пирки «Раҫҫей хаҫачӗ» ҫырнӑ.

Паян ҫакӑ паллӑ: Олимп вӑййисене Раҫҫейри пӗр ҫӑмӑл атлетка ҫеҫ хутшӑнма пултарать. Вӑл — Дарья Клишина. Ассоциаци ыттисен заявкисене пӑрахӑҫланӑ. Вӗсен йышӗнче — Чӑваш Ен спортсменӗсем те.

Аса илтерер: Олимп вӑййисене Чӑваш Енри ултӑ спортсмен хутшӑнма пултарнӑ. Вӗсем — Татьяна Архипова тата Алина Прокопьева марафонкӑсем, хӑвӑрт утакан Светлана Васильева тата Марина Пандакова, сӑнӑ ывӑтакан Вера Ребрик, шӑчӑпа сикекен Анжелика Сидорова. Вӗсем Раҫҫейри ытти спортсменпа пӗрле Ҫӑмӑл атлетикӑсен пӗтӗм тӗнчери ассоциацине заявка янӑ пулнӑ.

Спортсменсем парӑнасшӑн мар. Халӗ вӗсем Лозаннӑри Спорт арбитраж судне тавӑҫ тӑратма хатӗрленеҫҫӗ. Аппеляцие утӑн 19-мӗшӗнче ҫеҫ пӑхса тухӗҫ. Хурав вара утӑ уйӑхӗн 21-мӗшӗнче килӗ.

#Олимп вӑййисем, #спорт, #Рио-де-Жанейро, #ҫӑмӑл атлетика