Уявра

«Живи, цвети, моя деревня!» (ятне темшӗн чӑвашла паман вара) — иртнӗ кану кунӗсенче ҫак ятпа Малти Пукаш ялӗнче уяв иртрӗ. Ҫанталӑкӗ шӑрӑх тӑчӗ пулин те Сӗнтӗрвӑрри районне кӗрекен Октябрьски ял тӑрӑхӗнчи ялта халӑх чылай пухӑнчӗ — ҫур ял таранах тухрӗ. Уява йӗрекелес ыйтӑва ҫӗклекенни тата ӑна пурнӑҫа кӗртме тӑрӑшаканни — Октябрьски ял тӑрӑхӗн депутачӗ, ФАП заведующийӗ Ирина Фёдорова. Вӑл тӑрӑшнипех ӗнтӗ Малти Пукашсем хӑйсен ял уявне кӑҫал тӑваттӑмӑш хут ирттереҫҫӗ. Укҫине те пӗрле пухаҫҫӗ.

Ял лавкки умӗнчи асфальтланӑ тӳремре ял халӑхӗ иртенпех уява хатӗрленме пикенчӗ — пӗрисем сасса вӑйлатакан тата ытти аппаратурӑна вырнаҫтарчӗҫ, теприсем шӳрпе пӗҫерчӗҫ, виҫҫӗмӗшӗсем вара сӗтел сарчӗҫ.

Малти Пукаш ял уявне Октябрьски ял тӑрӑхӗн пуҫлӑхӗ Назаров С.М. уҫрӗ. Вӑл пурне те уяв ячӗпе саламларӗ, кӗскен юлашки вӑхӑтра ял епле аталанни пирки пӗлтерчӗ — яла ҫити асфальтлӑ ҫул сарнӑ, газ пур. Тепӗр майлӑ каласан ялта килленсе пурӑнмашкӑн пурте пур. Хӑйӗн сӑмахне вӗҫлесе вӑл ялти хастар ҫынсене хисеп грамотисем пачӗ.

Уявра ял халӑхне савӑнтарма Октябрьски, Чӑнкасси, Шӗнерпуҫ ял тӑрӑхӗнчи юрӑ-ташӑ ушкӑнӗсем килчӗҫ. Вӗсен пултарулӑхӗ пурне те килӗшрӗ.

Юрӑ-ташӑпа савӑннӑ хыҫҫӑн ял халӑхӗ сӗтел хушшинче ларчӗ. Тутлӑ апата тутаннӑ хыҫҫӑн каҫхине уяв дискотекӑпа вӗҫленчӗ.

Уяври сӑнсем

#Сӗнтӗрвӑрри районӗ, #Малти Пукаш, #Октябрьски ял тӑрӑхӗ, #Чӑнкасси ял тӑрӑхӗ, #Шӗнерпуҫ ял тӑрӑхӗ, #ял уявӗсем