Ҫак вӑхӑтра, кӗр вӗҫӗнче тата хӗл пуҫламӑшӗнче, ҫынсем ОРВИпе тата гриппа чирлеме тытӑнаҫҫӗ. Халӗ ав урамра нӑшлатса ҫӳрекен, апчхулатакан ҫын нумай. Специалистсем палӑртнӑ тӑрӑх, кӑҫалхи сезонта «грипп эпидемийӗ» кӑрлач уйӑхне лекӗ. Анчах паянхи кун та чирлекенсем самаййӑн.

Паллах, никамӑн та чирлес килмест. Анчах ку аптекӑсемшӗн питӗ тупӑшлӑ тесе калас килет. Ара, Шупашкарта миҫе аптека пулнине шутланӑ-и эсир? Кашни утӑмрах, кашни чарӑнурах… Шутлама пуҫласан ҫухалса кайма пулать. Ҫапах кашни аптекӑнах ҫынсем кӗреҫҫӗ-тухаҫҫӗ… Пурте эмел туянаҫҫӗ. Ӑҫта ан кӗр – пур ҫӗрте те халӑх, пурне те эмел кирлӗ.

Нумаях пулмасть, ҫак кунсенче, юлташӑм чирлерӗ. Иксӗмӗр аптекӑналла ҫул тытрӑмӑр. Пӗр эрне маларах хам та пырпа аптӑраса ӳкнӗччӗ те ӑна «Амброксол» туянма сӗнтӗм. Ара, вӑл хаклах мар-ҫке-ха. Аптекӑна кӗтӗмӗр. «Чи йӳнӗ хаксем» тесе ҫырнине. «Ладушка» текеннине. Халӑхра унта йӳнӗ тесе калаҫаҫҫӗ вӗт. Анчах хӑшӗ-пӗри ҫакна хирӗҫлет. Фармацевтран ҫак эмеле пама ыйтрӑмӑр. Пур тет, анчах темле «гексал» тесе ҫырни. Вӑл 200 тенке яхӑн тӑрать-мӗн. «Ахальли ҫук-им?» - ыйтрӑмӑр унран. Ҫук. Ку эмелӗ ют ҫӗршывра кӑларни, чапли-мӗн… «Сирӗн хамӑр патра, Раҫҫейре, кӑларни ҫук-им?» — ҫаплах хӑпмарӑмӑр унран. Ҫук. Мӗншӗн? Ара, вӑл, ют ҫӗршыври, самай хаклӑрах, тупӑш ытларах кӳрет-ҫке-ха. Кӑмӑлсӑр тухса утрӑмӑр «чи йӳнӗ аптекӑран».

Аптекӑра ӗҫлекенсем чее. Вӗсен те ытларах ӗҫлесе илес килет пуль ҫав. Пӗррехинче шӑнса пӑсӑлтӑм та тута ҫине шатра тухса ларчӗ. Аптекӑна «Ацикловир» туянма вӗҫтертӗм. Пӗлетӗп: хаклӑ тӑмасть вӑл. «160 тенкӗ» — лаплаттарса хучӗ шурӑ халат тӑхӑннӑ хӗрарӑм. «Вара ҫак хушӑрах хакӗ ӳсрӗ-шим?» - тӗлӗннине пытармарӑм эпӗ. «Ку — ют ҫӗршывра кӑларни», — пулчӗ хурав. Мӗн, хамӑрӑнни ҫук-им? Пур иккен. Шырасан вӑл та тупӑнчӗ. 40 тенке яхӑн ҫеҫ тӑрать. Аптекӑран тӗлӗнсе тухрӑм. Ҫавӑнтанпа вӑл е ку эмеле туяннӑ чухне тӳрех калатӑп: «Хамӑр патра кӑларнине парӑр». Вӑл самай йӳнӗрех. Пире вара, шалуран шалӑва аран-аран хӗстеркелесе пурӑнакансене, мӗн кирлӗ ӗнтӗ?

#аптекӑсем, #сывлӑх, #чирсем, #хаксем