Виктория Тихонова

Паян, раштавӑн 13-мӗшӗнче, Чӑваш патшалӑх филармони залӗнче «Чӑваш пики – 2015» конкурс иртрӗ. Унта Елчӗк районӗнчен — Диана Соснова, Йӗпреҫ районӗнчен — Анжела Ефимова, Тутар Республикинчен — Карина Григорьева, Шупашкар районӗнчен — Анна Кириллова, Куславкка тӑрӑхӗнчен — Елизавета Сергеева, Канаш хулинчен — Ольга Зайцева, Тӑвай районӗнчен — Анастасия Гурьева, Патӑрьел районӗнчен — Мария Самделова, Вӑрнар районӗнчен — Олеся Никитина, Комсомольски районӗнчен — Диана Карпова, Ҫӗрпӳ тӑрӑхӗнчен — Марина Арсентьева, Элӗк районӗнчен — Инесса Шашкина, Трак тӑрӑхӗнчен — Анна Васильева, Сӗнтӗрвӑрри районӗнчен — Ксения Федотова, Муркаш тӑрӑхӗнчен — Виктория Тихонова, Етӗрне районӗнчен — Анастасия Матвеева, Чӗмпӗр облаҫӗнчен — Наталья Портнова, Хӗрлӗ Чутай районӗнчен Ирина Романова килчӗҫ.

Пикесем 5 номинацире тупӑшрӗҫ. Малтанах вӗсем хӑйсемпе паллаштарчӗҫ, унтан пултарулӑх конкурсӗ иртрӗ. Кун хыҫҫӑн хӗрсем ыйтусен хуравӗсене пӗлчӗҫ, хӑйсем пӗҫернӗ наци апат-ҫимӗҫӗпе паллаштарчӗҫ, хитре тумӗсене кӑтартрӗҫ.

Жюри пайташӗсем чылай вӑхӑт канашланӑ хыҫҫӑн пӗтӗмлетӳ турӗҫ. Куракансен кӑмӑлне каякан пике Олеся Никитина пулчӗ. «Ҫепӗҫ пике» — Диана Карпова, «Хӳхӗм пике» — Ольга Зайцева, «Ӑслӑ пике» — Анастасия Матвеева. Номинацире ҫӗнтернисене планшетпа чысларӗҫ. Кӑҫал «Вице-Чӑваш пики» Анастасия Гурьева пулса тӑчӗ. «Чӑваш пики» ята вара Муркаш тӑрӑхӗнчен килнӗ Виктория Тихонова тивӗҫрӗ. Ӑна ҫитес ҫул Крымра канмашкӑн путевка пачӗҫ.

#Чӑваш пики, #Вӑрнар районӗ, #Канаш районӗ, #Муркаш районӗ, #конкурссем, #Тӑвай районӗ, #чӑвашлӑх